Chanchin thar lawrkhawm :

ASHA te la nuar zui zel

Accredited Social Health Activist (ASHA) Volunteer-te chuan hun rei tak chhung an thawh lawmman an dawn tawh loh avanga tun thla ni 1 atanga an hna an chawlhsan lailawk chu an la chawlhsan lailawk chhunzawm zel. Mizoram ASHA hruaitute sawi danin hlawh an lak hnuhnung ber chu nikum August thla a ni a, hun rei tak chhung hlawh an lak tawhloh avang leh sawrkar in a ngaihsak tawk loh avangin an lungawilohna lantir nana an hna chu chawlhsan rih an an nih thu an sawi bawk. Mizoram ASHA hnathawk hi an vaiin mi 1,091 niin National Health Mission hnuaia scheme hrang hrangah hna an thawk a, an lungawi lohna hi sawrkar hotute hnenah pawh an thlen tawh thu sawiin, an hna an chawlh hnuah NHM Mission Director nen inkawm tum mah se, an pawl hruaitute zingah COVID-19 hri kai an awm nual avangin an la inkäwm lo tih an sawi bawk. 

Hnahlan khua ah In kang

Champhai District chhung Hnahlan khua a Sairengpuii te In, Assam Type chu nimin chhun khan a kang a, bungrua engmah chuh hman a ni lo. Thudawn danin he In hi chhungkaw pahnih ten an luahlai niin In neitunu hi damlo awmpuiin damdawi In-ah a awm a, In-ah hian a fate awmin kangmei chhuah chhan hi chiang taka hriat ni lo mah se misualin a hal luih nia rin a a ni a, kangmei tichhuaktu nia rin hi khawtlang hruaituten la hrangin thu zawhfiah mek a ni a, Hnahlan hmuna kal Champhai Police Thana-a OC leh a thawh-puite kutah hlan a ni ang. Kangmei vang hian bungrua cheng nuai 6 hu vel a kangral nia chhut a ni a, Vawiin hian In sak that hna thawh a ni ang.

PDRD Grant pechhuak

Union Finance Ministry chuan a thlatin-a a pekchhuah thin Post Devolution Revenue Deficit (PDRD) Grant cheng vbc. 9871 chu Mizoram leh State dang 16 tan Inrinni khan pechhuakin State ten chhiah atanga an sum hmuh tur ang an phak lohna hnawhkhat tura pek a ni.

SSU Special Assembly nei

Students’ Self-Support Union (SSU) General Hqrs. chuan Inrinni khan Aizawl Press Club ah Special Assembly neiin hruaitu thlanna an nei a, K. Laldawngliana MLA chuan khuallian nia hmanpuiin thawh hreh nei lova hna remchang apiang thawk thei zel tura tanlak a pawimawh thu a sawi.

Red Zone-ah 83 puang

Aizawl District-ah COVID-19 hri leng a hluar zel avangin Veng leh khua 83 te chu Red Zone-ah puan an ni a, heng te hi ni 10 kalta chhunga veng chhung mi za zela 10 aia tam hri kai awmna niin Red Zone list hi chawlhkar tin a thara siam zel tur a ni dawn a ni.