Feb. 22 atanga March 10 thleng Session nei dawn

Tun thla ni 22 atanga tan tur Mizoram Legislative Assembly Budget Session chu March 10, 2022 thleng awh tura ruahman a ni.

Assembly Speaker Lalrinliana Sailo hova Business Advisory Committee thukhawm chuan tun tum Session-a hun hman dan tur hi duangfel tawhin ni 12 thutkhawm neih tur he Session tan ni hian House-ah Governor in thu a sawi anga, a tuk Feb. 23-ah member hlui boral te sunna hun hmangin Governor thusawi chungchanga lawmthu sawina Motion chu sawiho-a pawm tum a ni ang.

February 24-ah Finance changtu Chief Minister in kum 2022-2023 sum hman tur budget leh kum 2021-2022 sawrkar sum indaihloh phuhrukna tur (Supplemetary demand) a pharh anga, ni 25.2.2022-ah zawhna leh chhanna hun hman zawhah Private Member Resolution sawiho a ni ang. Ni 28.2.2022 leh 1.3.2022-ah te Budget a tlangpuia sawihona (General Discussion) neih a ni anga, ni 2.3.2022 atangin Minister hrang hrang te demand sawihoa pass tum a ni ang.

Tun tum Session neih tur atan hian Dan siam tur pakhat leh Dan dinglai siamthatna tur Bill pahnih a lut tawh a, Private Member Bill pakhat a lut tawh bawk a ni.