Kawlphetha man tihsan rawtna sawiselna 5 lut

Mizoram sawrkar in kawlphetha chhit man tihsan rawtna a siam chu huntiam chhungin pawl 5 ten sawiselna an thehlut nia thudawn a ni.

Thudawn danin Mizoram sawrkarin Mizoram leh Manipur-a kawlphetha hman man (power tariff) bithliahtu, Joint Electricity Regulatory Commission for Mizoram and Manipur (JERC)-ah kum 2022-23 atan kawlphetha hman man ennawn a, tihsan a rawt chungchangah hian January 28, 2022 khan Power & Electricity Department chuan kawlphetha hman man tihsan an rawt thu leh sawiselna leh rawtna JERC-a thehlut duh tan February 20, 2022 thleng hun hawn a nih thu an lo tar lang tawh a, sawiselna leh rawtna thlentuten hmaichhanah an duh angte an sawina hun (public hearing) buatsaih leh tur niin, Power & Electricty Department lamin an duh dante an sawi ve bawk dawn a ni.

JERC hotute chuan Inrinni thleng a ziaka sawiselna an dawn zat chu panga niin, chungte chu mimal atangin pakhat, Political party atangin ZPM, MPYCC leh MPC bakah NGO atangin Central YMA te an ni tih an sawi a. Sawrkar kum kal mek, 2021-22 Power Tariff atan Mizoram sawrkar chuan nikum 2021 khan 41.92% a tihsan a lo rawt tawh a; mahse, JERC chuan Mizoram sawrkar rawtna chu pawm loin, 20.68%-in a tisang a. Tunah hian Mizoram sawrkar chuan kawlphetha man hi 21.05%-a tihsan a rawt a, sawrkarin rawtna a siam anga Power Tariff tihsan a nih chuan sawrkarin a subsidise hnuah chawhrualin power Unit khat man Rs. 8.80 a ni dawn a, tariff hman mekah chuan Unit khat man Rs. 6.71 a ni a. Electric hman man tuna rawtna anga tihpun a nih chuan rate hman mek lai aiin cheng vbc. 75.83 hmuh belh tura chhut niin Department in revenue a hmuh tur zat a hmuh tlin loh thinna a tihziaawm beisei a ni.

Comments

Popular posts from this blog

Tukverh-a tlasual boral