Serchhip District-a COVID-19 hri kai hmuh-chhuah mi pahnih te chu enkawl dam an nih hnuah nimin khan anmahni enkawlna hmun atanga chhuahtir leh an ni a, Serchhip District-a hri kai hmuhchhuah atangin zaa 98.85 te chu enkawl dam an ni tawh.
Serchhip DTO Office-a lirthei ziahluh thar chuan sing khat tlingin nimin tlai atang khan Registration number pek-ah ‘A’ pek belh a ni ta.
Niminpiah-a Mizoram-a Sample enfiah atangin COVID-19 hri kai mi 35 zet hmuhchhuah leh an ni a, a tam zawk chu Aizawl khawpui Veng hrang hrang ami te an ni.
Pathianni kalta-a Vairengte Kawngthar Branch YMA duty ten ruihhlo tawlhru a puh an man leh niminpiah-a Vairengte CHC-a boralta, Intyaz Ali (48), Lailapur ruang chu nimin khan Vairengte leh Lailapur inkar Auto Rickshaw Transit Stand-ah inhlanchhawn a ni a, he thihna avang hian boruak duhawmlo a thlen thu hriat anilo.
Health Minister, Dr. R. Lalthangliana chuan Aizawl Municipal Area-a inkharkhip puan mek chu pawngpaw puan ngawt a nih loh thu a sawi.
Kum 2015 January thla-a Aizawl Republic Veng-a chhungkaw pakhat-a mi 5 lai thattu, Laltlanchhuaha chu Court in thiamloh a chantir a, tun thla ni 5 khian hremna tur puanchhuah a ni ang.
MNF MLA mi 12 ten Serchhip bialtu MLA, Lalduhoma MLA atanga ban tura Assembly Speaker hnena ngenna an thlen chungchangah nimin khan Speaker hovin Hearing neih a ni.
Mizoram-a COVID-19 hri kai hmuhchhuah zingah an fa te hri kai ve lo, In lama enkawltu neilo te buaipui dan tur chu nimin khan Health Minister, Dr. R. Lalthangliana hovin sawiho a ni a. Standard Operating Procedure (SOP) siam tur Committee an din nghal a ni.