Mizoram Governor in Horticulture, PWD leh Agriculture Department hotute a kawm

Mizoram Larsap Dr. Hari Babu Kambhampati chuan nimin khan Raj Bhavan-ah Horticulture, PWD leh Agriculture Department hotute kawmin Bamboo Link Road Project kalpui dan tur an sawifiah a. Agriculture Department Official te hian Mizoram chhunga hmasawnna hna leh Scheme hrang hrang an kalpui dan an sawi bawk.

Horticulture Department leh PWD aiawh Official te hi Addl. Chief Secretary JC. Ramthanga chuan ho in tunhnaia Sawrkar Laipui in Union Budget 2022-2023 a pharha North East tana duan PM-DevINE hnuaia Mizorama hmalakna tur pawimawh tak Bamboo Link Road chungchang chu chipchiar takin Larsap hi an hrilhfiah a. Bamboo Link Road atan hian cheng vbc. 100 dah a niin Mau chinna hmun, kawngpuiin a tlawhpawh loh te chu lirthei tlan theihna tura kawng sial a ni anga, Mau chinna hmun atanga a zawrhna hmun leh a leitute hnen phurh thlen a nih theihna turin leh a phurh man atana senso a lo tlawm zawk theih nan heng kawng te hi sial a ni ang. 

Larsap chuan Bamboo Link Road sial tura ruahmanna hrang hrang an siam dan leh kalpui dan te a zawt a, loneitute tana a tangkai theih dan tur te, man man zawka Mau leh Mau atanga thil siamchhuah hralh a nih theihna tur rawtna te sawipuiin, he Project hi a hun taka thawk zo ngei tura a duh thu Official te hi a hrilh a. Cheng vbc. 100 senna tur Bamboo Link Road Pilot Project chu hlawhtling taka kalpui a nih chuan sum tam tham zawk Sawrkar Laipui atanga hmuh belh a awlsam dan tur te a sawipui bawk a ni.

Larsap hian Dragon Fruit Plantation chungchang Horticulture Department aiawhte a sawipui bawk a, Mizoram chhunga hmalak tan a nih dan sawifiahin Horticulture mithiamten Thailand leh Vietnam an tlawh atanga he hmalakna hi Mizoram-ah tan a nih dan Horticulture Director chuan a sawi a. Heng ram atang te hian a Chi hawnin Mizoram-a Horticulture Centre of Excellence-ah chin tan a ni a, Mizoram sik leh sa in a ngeih zia leh a that duhzia te a taka an hmuh hnuah uar taka kalpui a ni ta a. Kum khatah vawi 4/5 te rah thinin ram dang te thar chhuah Dragon Fruit chhung var aiin Mizoram-a chhunga thar a chhung sen chu a thlum zawk avangin hralh a kalin a chingtute farmer ten an hlawkpui hle niin an sawi bawk.

Agriculture Department Official te hi an Secretary J.Hmingthanmawia chuan ho in Agriculture Director Rohmingthanga Colney chuan Mizoram chhunga loneitute tana hma-sawnna hna hrang hrang Department in a thawh dan te chipchiar takin a hrilhfiah a. Centrally Sponsored Scheme sawmpahnih (12), UN hnuaia IFAD leh FAO-ah pakhat ve ve bakah Central Scheme (CS) chi hnih Krishi Vigyan Kendra leh Mission Organic Value Chain Development for North Eastern Region (MOVCD-NER) an kalpui dan te a sawifiah a. Hei bakah hian Central Sector Scheme - 10,000 FPOs Mizoram chhunga an kalpui dan leh Mizoram sawrkar flagship programme SEDP an kalpui dan te, loneitute chawikanna tura Department in peng hrang hranga hma a lak tawh dan leh ruahmanna an siam te Larsap hnenah hi an hrilh a ni.

He hunah hian Larsap chuan Organic Farming chungchanga an hmalakna zawtfiahin heng Organic thlai thar te hi mumal taka Certificate pek an ni em tih a zawhna chu chhangin Certifying Agency pahnih leh Farmer te kaihruaia training pe thei tur Agency dang pahnih an rawih mek thu an hrilh a. 10,000 FPO Scheme Mizorama kalpui dan chipchiar takin Agriculture Official te hian sawiin, he Scheme hnuaiah hian Sawrkar Laipui chuan Mizoram tan FPO sawmpahnih (12) din turin a ruahman a. Tunah hian FPO pasarih (7) din a fel a ni tawh a. Implementing agency atan NERA-MAC, NABARD/SFAC leh NAFED te hman mek an ni.