COVID-19 hri leng avangin nimin thleng khan Serchhip District-ah inkhunghrang mi 1876 an awm tawh a, mi 1699 te chu chhuahtir ni tawhin inkhunghrang mi 177 an la awm mek bawk.
Mizoram-ah COVID-19 hri kai mi 26 hmuh belh leh niin heng te nen hian Mizorma-ah hri kai hmuhchhuah zawng zawng chu 1786 an tling tawh.
New Delhi-a cham mek Mizoram Rajya Sabha MP, K. Vanlalvena chuan niminpiah tlai khan Union Sports Minister, Kiren Rijiju chu a chenna In-ah hmu in Mizoram tan thil pawimawh tak tak pali (4) a thlen.
Mizoram Governor, P.S. Sreedharan Pillai chuan nimin khan Raj Bhavan Banquet Hall-ah Dr. Sushi Singh-in Lockdown chhunga lem ziah dan chi hrang hrang hmanga a ziah, Lemziak 30 te Lehkhabua (catalogue) a siam, “A timeless Journey Towards Real Freedom” chu a tlangzarh. Heng lemziak tlangzarh tak te hi Mizoram leh a chhunga chengte chungchang leh hlimthla te Lemziaktu in a hmuhdan tarlanna deuh vek niin TV Screen-ah enho chhunzawm nghal a ni.
Serchhip District Fisheries Development Officer (DFDO) Office chuan nimin khan Serchhip Circle huamchhunga Sangha khawitute hnenah SEDP kaltlangin man tlawm zawkin Sangha chi an hralhchhuak.
Rashtriya Poshan Maah (National Nutrition Month) Programme chu nimin khan KVK Serchhip District leh CDPO, Serchhip te tangkawpin hman a ni a, he programme hi a huho a hman theih a nih loh avangin Video Conferencing hmangin hman a ni.
Serchhip-a rawn kal Gauhati High Court-a Judge, Michael Zothankhuma leh Gauhati High Court-a Judge leh Portfolio Judge for Serchhip District ni bawk, Justice Nelson Sailo te chuan nimin khan Serchhip District Jail tlawhin Jail tang te leh thawktute an kawm.
Serchhip Khawtetlang-a cheng nuai 422.70 senga sak thar, Judicial Officers' Residential Complex chu nimin khan Gauhati High Court-a Judge, Michael Zothankhuma leh Gauhati High Court-a Judge leh Portfolio Judge for Serchhip District ni bawk, Justice Nelson Sailo te chuan an hawng.