Health Minister hova AYUSH Governing Body thukhawmin hmalakna tur hrang hrang an sawiho

Mizoram State AYUSH Society Governing Body chu nimin khan an Chairman leh Health Minister Dr. R. Lalthangliana hovin SAD Conference Hall-ah an thukhawm.

He thutkhawm ah hian Health Minister chuan AYUSH chu sawrkar laipuiin a ngaih pawimawh avangin Mizoram State chhungah hmasawnna hna pawh chak takin a kalpui theih a, tun dinhmunah District hrang hrang tan Hospital thar, khum 50 awm theihna tur leh khum 10 awm theihna tur dil mek a ni tih sawiin, Sawrkar Laipui Ministry of AYUSH chuan heng proposal te hi a pawmpui tawh a ni, a ti a. Heng Hospital dinna tur atana sum ruahman ah hian thawktu rawihna tur leh bungraw mamawh leina tur pawh dah tel a ni tih a sawi bawk.

He huna tarlan a nih danin AYUSH Mizoram chuan National AYUSH Mission hnuaiah kum 2020-2021 chhung khan District 11-a khaw 44-ah a thlawna inentirna a buatsaih a, District tina Childrens Home zawng zawngah pawh buatsaih niin, District tina sawrkar enkawl Middle School-ah School Health Programme an buatsaih a. Ruihhlo ngaite enkawlna Home-ah Physical & Stress Mnagement Session an neihpui thin bawk a, Sports Association leh club thenkhatte nen thawk hovin Physical and Stress Management Session an neihpui thin bawk a ni.

Sawrkar laipui duhdan angin Mizoram chhunga Sub-Centre awm zawng zawng atanga chhuta za zelah sawm (10%) chu AYUSH Doctor te enkawl turin Health & Wellness Centre-ah siam a ni dawn a, Sub-Centre 38 te chu Mizoram District 8 atanga thlanchhuah niin National AYUSH Mission, Mizoram chuan a enkawl dawn a, an zinga Centre 24 te chu tha taka function tir an ni tawh a, a bak 14 te kalpuina tura thawktu lak thuai tura dilna chu an pawmpui a ni.

Kum 2020-2021 khan AYUSH Hospital khum 50 awmna tur DPR chu Champhai, Hnahthial leh Aizawl atan Ministry of AYUSH chuan a thuphungin a pawmsak tawh a. Saitual, Hortoki leh Khawzawl-ah te khum 10 awmna Hospital pakhat theuh sak dilna DPR thehluh pawh Ministry chuan a thuphungin a pawmsak tawh a ni. New Capital Complex ah AYUSH Development Centre sak tum niin dilna hi North Eastern Council ah thehluh a ni a, hei pawh hi a thuphunga pawmpuina (approval) hmuh a nih tawh thu Meeting-ah hian tarlan a ni.