Chanchin thar lawrkhawm :

Chapchar Kut hman dan tur rel

Thla thar March 4-a Aizawl-a Chapchar Kut hman dan tur ngaihtuahin nimin khan Prog-ramme Sub-Committee chu an Chairman leh Art & Culture Department Director R. Hmingthanzuala hovin an thukhawm a, kumin Chapchar Kut thupui atan Orgainising Committee in rawtna hrang hrang a chhawpchhuah zingah ‘Zonun Zemawi - Rinawmna’ tih chu thlan a ni. Hri leng avanga punkhawm a remchan loh avangin nikum lam ang bawkin Chapchar Kut hawnna hi Vanapa Hall-ah mi tlemte telna turin hman a ni anga, hemi hnu hian Virtual Programme a chhunzawm turin ruahmanna siam a ni. Hetih rual hian hripui karah Chapchar Kut hi hlim tak leh hlawk taka hman a nih theih nan Programme dang - TV Discussion leh Hnam incheina a inthuam hun te leh thil-pek hlan te pawh ruahman tel a ni.

DGP in Governor inkawm

Mizoram Director General of Police (DGP) thar Devesh Chandra Srivastava IPS chuan nimin khan Mizoram Governor Dr. Hari Babu Kambham-pati chu Raj Bhavan-ah hmuin inkawmna an nei a, Larsap chuan DGP thar chu duhsakna hlanin Mizoram a awm chhungin theihtawp chhuahin Mizoram leh mipuite tan hna thawk turin a chah. Larsap chuan Mizoram chu India rama State ralmuang berte zing a mi ni mahse ram pahnih, Myanmar leh Bangladesh in a karcheh avangin Police chuan Assam Rifles leh Border Security Force te nen thawhhona tha tak neiin venhimna hna an thawk thin tih a sawi a, chu chu tha taka chhunzawm zel turin DGP chu a chah a ni. DGP thar hi AGMUT cadre niin 1995 IPS Batch a ni.

Media Awareness Programm

Mizoram Journalists' Association (MJA) Golden Jubilee lawmna kal zelah nimin khan MJA Lawngtlai District huaihawtin Lai Autonomous District Council (LADC)-a Department hotu (Head of Department)-te tan LADC Conference Hall-ah Media hman chungchang inzirtirna (Media Awareness Programme) buatsaih a ni.

Mi bo ruang hmuh a ni

Tunkar Thawhlehni atanga chin hriatloh a bo F. Ramfangzauva, Thenzawl Field Veng chu nimin chawhnu dar 1:00 vel khan an chenna In bula In saklai-ah thi-a hmuh a ni. Thudawn danin F. Ramfangzauva (37) s/o F. Rohmingthanga hi tunkar Thawhlehni zan dar 6:00 vela an In atanga a chhuak chu chin hriatloh in a awm zui a, Nilaini ah chhung-khat laina leh an awmna Branch YMA Member ten an zawn hnuah hmuh a nih tak loh avangin nimin khan Thenzawl Joint YMA chuan  an hnuaia Branch te chu mahni remchan anga zawng tur leh chuta an hmulo a nih chuan Vawiin hian a huho-a zawn hna thawk turin an ruahman a, amaherawh chu nimin chawhnu dar 1:00 vel khan an thenawm a mimal In saklai-ah a ruang hi hmuh a ni ta a ni. F. Ramfang-zauva taksa-ah hian hliam emaw, midang khawihna hnuhma emaw hmuh tur a awmlo nia thudawn a ni.

Kangmei ven dan tur sawiho

State Level Committee on Fire Prevention in a lo rawt tawh bawhzuiin nimin khan Champhai  DFO Office-ah Police hotute leh Environment, Forest & Climate Change Department hotute chuan kangmei ven chungchanga chak zawka hmalak tlan theih dan tur an sawiho a. Kangmei chhuak tur venna turin VC leh mipuite hnenah a zau thei ang berin kangmei tichhuaktu laka hremna dan hman lai mek te puanzar leh kangmei tichhuaktu lakah khauh taka hremna lekkawh nise tiin ramvak thinte chu kangmei tichhuaktu ni fo a hriat an nih avangin ramvak lo turin mipuite an ngen a, ramvakte vai turin Wildlife Crime Control Sub-Unit te duty nise, dan bawhchhia an awm a nih chuan dan angin khawng taka hmalak nise an ti bawk.