Mizoram-ah ni khat-a COVID-19 hri kai hmuhchhuah zat ala tlahniam hlei thei lova, niminpiah khan Mizoram-ah Sample 3666 enfiah leh niin heng atang hian hri kai 239 hmuhchhuah leh an ni a, Mizoram-a hri kai hmuhchhuah pawh sang kua aiin an tam tawh a ni.
Nikum March thla-a Mizoram-a COVID-19 hri kai hmuhchhuah an nih hnuah May thla kan hman mek chu COVID-19 hri kai hmuhchhuah an tam ber thla a ni mek a, tun thla ah hian ni 18 chiah kan la hman chhungin hri kai 2937 hmuhchhuah an ni tawh a ni.
Darkar 24 kalta chhung khan Serchhip District-a African Swine Fever lenna hmunah Vawk thi 3 awm lehin Serchhip-ah chhan hriatloh a Vawk thi pakhat a awm bawk.
Serchhip District-ah nimin thleng khan COVID-19 hri kai 485 hmuhchhuah ni tawhin an zinga 413 te chu enkawl dam an ni tawh a, hri kai enkawllai 71 enkawl mek an ni a, nunna chan mi pakhat a awm tawh bawk.
Sawrkar in kum 18 leh 44 inkar-a a ngaih pawimawh hmasak te hnena COVID-19 hri danna a pek chu Serchhip-ah pawh nimin khan kalpui tan a ni.
MZP chuan Muallungthu Village Council ten Zoram Medical College Extension atana Govt. Primary School leh Govt. Middle School building leh ram Health & Family Welfare Department hnena an pe ringawt mai hi mak an tih thu leh hriatthiam har an tih thu an sawi.
Sawrkar hnathawk COVID-19 dona atana pawisa thawh ve remchang lo tura in report tura tih chu sawrkar hnathawkte indirect-a vauna, sawrkar tanpui nana mahni hlawh thawh remchang theilo te chhinchhiah tumna a nih thu Congress Party chuan an sawi.
State Level Sub-Committee in Green Mizoram chu nimin khan thukhawmin he hunah hian Forest Minister, TJ. Lalnuntluanga chuan thingtiak phun tam aia phun chhun apiang hlawhtling tura enkawl chhunzawm lam ngaih pawimawh a tul thu a sawi.