MSU in Kamrul Laskar Uddin zawn hna thawh tum

Mizo Students’ Union (MSU) General Hqrs. chuan Kamrul Laskar Uddin-a Tribal Certificate, Kamlova Chhangte tih hminga awm chu February ni 18, 2022 hmaa a surrender lo a nih chuan amah zawn hna hi an thawk dawn tih an sawi.

Nimin a thuchhuah an siamah MSU General Hqrs. chuan dik lo taka Tribal Ccertificate Kamlova Chhangte inti hnena pekchhuah chu November ni 23, 2021 khan cancel turin Aizawl D.C hnenah ngenna an thehluh tawh thu sawiin, amah pawh be pawpin innawr buai ngai lova amah ngeiin Tribal Certificate a neih cancel dilna ziaka thehlut mai turin thurawn an pek thu an sawi a. MSU ngenna pawh sawrkar lamin bawhzuiin Inquiry pawh lak nghal ni mah se Bawrhsap Pisapui kang avangin hmalakna a khaihlak ta tih an sawi.

MSU chuan hemi chungchangah hian hma an lak zui reng thu leh Feb. 5, 2022 khan Kamrul Laskar Uddin pawh MSU Pisa Pui-ah lengin MSU ruahmanna anga Feb. 7, 2022-ah DC Office-a Tribal Certificate cancel tura ngenna lehkha thehlut turin a intiam niin an sawi a. Hemi ni hian Kamrul Laskar Uddin hian hna pawimawh neia insawiin lehkha a thehluh hman loh thu MSU hruaitute a hrilh thu leh biakpawh theih lovin a awm zui ta tih an sawi a. Hetianga Mizo te Tribal nihna in-a a ken tel hamthatna chuhpui duhtu hi Mizo Hnam tana mi hnawk takah an ngai tih sawiin, tha taka an dawrna zahlotu chet dan chu enliam mai har an tih thu an sawi a, “Hemi avang hian MSU hnena a intiam ang ngeia Tribal Certificate hi February ni 18, 2022 hmaa a surrender lo a nih chuan MSU chuan Kamrul Laskar Uddin zawn hna hi a thawk dawn a ni,” an ti bawk.