Kangmei laka fimkhur a pawimawh zia inzirtirna hun ‘Fire Prevention Week, 2022’ hawnna neih a ni

Kangmei laka fimkhur a pawimawh zia leh kangmei tichhuak lo tura inzirtirna Hapta, Fire Prevention Week, 2022 chu nimin khan Serchhip-ah a hawnna neih niin ‘Kangmei ven hi mitin mawhphurhna a ni’ tih chu kumin hian thupui atan hman a ni.

Serchhip-a Fire Prevention Week hawnna hi nimin khan Serchhip DC Conference Hall-ah neih niin District Bawrhsap Nazuk Kumar IAS chuan khuallian niin a hmanpui a, Bawrhsap chuan ramngaw chu a chhunga cheng nunna neite nena inzawm tlat a nih thu leh mihringte pawh chung zinga mi chu kan ni tih sawiin, Mizote pawh hmanlai ata mamawh chi hrang hrang kan hmuhna leh ramhmul damdawi chena ramngaw hmang tangkai thin kan ni tih a sawi a. Ramngaw chu kan lui leh tuihna te min siam saktu leh kan sik leh sa vawngtu pawimawh a ni tih sawiin, “Kan hriat angin ramngaw tichhetu hlauhawm tak chu ramkang hi a ni a, kangmei hi thil kan ngaihthah palh ho te atanga lo chhuak mai thei a nih bawk si avangin Serchhip District mipuite ramngaw humhalh kawngah te, ram kang venna kawngah leh fimkhurna kawngah te thapui thawh thar leh turin ka sawm che u,” a ti a, Sawrkar Department hrang hrangte, tlawmngai pawl, chanchinbumite leh khawtlang hruaitute pawh thawhhona tha tak nei zel chunga ramngaw humhalh leh kangmei venna lama tan la sauh sauh turin a fuih a ni. Bawrhsap chuan tlawmngai pawlte inpekna avanga Mizoramin thil tha tam tak a neih tawh thu sawiin, khaw tina tlawmngai pawlte chu tun atanga inbuatsaiha, mahni zawnah theihtawp lo chhuah zel turin a ngen bawk.

District Honorary Wildlife Warden RL. Chhuanawma kaihhruai he hunah hian District Fire Prevention Committee-a Member Secretary leh Thenzawl DFO Lalbiakchama Chawngthu chuan kumin a Fire Prevention Week hman dan tura ruahmanna an siam leh ramngaw leh kangmei chungchanga Mizoram dinhmun a tarlang a, nikum lamah kumdang aiin Mizoram-ah kangmei chhuak a tam thu leh harsatna tam tak kan tawh thu sawiin, kum 2 dan-a Forest Survey of India in report a tihchhuah ah Mizo-ram-a ramngaw in a khuh chin zau zawng chu a tlahniam tial tial nia a lan thu a sawi a. Forest Survey of India in nikum chhunga ramkang report tum 12,726 a dawn ah tum 4486 chu Forest Department-ah hriattirin heng an enfiah atang hian ramkang tum 205 a awm thu a sawi a, a bak chu Lo hal hnua thildang halna a ni tih a sawi.

Kum 13 kalta chhung khan Mizoram chu India State leh UT-ah ram tikang nasa ber kan nih thu pawh DFO chuan sawiin, Mizoram bikah Serchhip District chu Forest Cover area nei chhe ber dawttu kan ni tih a sawi a, Fire Prevention Week hman a nih hnuah Serchhip District chuan kangmei venna kawngah lawmman pakhatna ala lak ngai loh thu pawh sawiin, kumin ah lawmman pakhatna la thei ngei tura kan tanrual a tul thu a sawi a. Kangmei chhuak avanga chhiatna nasa tak kan tawh thin thu pawh sawiin, kangmei chhuah hnua thelh leh tum chu a hautak avang leh tha tam tak sen a tul tawh thin avangin kangmei tichhuak lo tura kan fimkhura kan tanrual a pawimawh thu a sawi a, kumin hian kangmei venna kawnga thawk tha khaw pathum an thlan thin bakah lawmman dawng tur khaw dang pathum thlan-chhuah an nih dawn thu a sawi bawk.

He hunah hian Serchhip Sub-Hqrs YMA President Kawlthuama pawhin sawrkar in kangmei venna atana Lo hal hun a ruahman thin chu mipui ten zawm tha thin mah se a hnu lama thildang hal avanga kangmei chhuak a tam thin thu leh Serchhip District-ah pawh nikum a ramkang hmasa ber chu April ni 19-ah a nih thu leh Serchhip-a Veng hrang hrangah kangmei chhuak lo a awm meuh lo tih a sawi bawk.

Serchhip-a Fire Prevention Week hawnna huna kalkhawmte hian 'Kangmei Ven Thutiam' chu an sawirual nghal bawk a ni.