Serchhip by-pass Road siam meka Lei dawh nakum chhunga zawhfel hman tum a ni

Serchhip February 16 : National Highway-54 kawngpui laihzauh leh siamthat hna thawh mekin Serchhip khawpui a helna tura Lei (Bridge) dawh hna kalpui mekah hnathawktute chuan harsatna liantham tawh an nei lo tih sawiin, nakum (2023)-ah chuan zawh theih ngei an inbeisei thu an sawi.

NH-54 in Serchhip khawpui a helna tura kawng laih meka Sailiam lui kawr-a Lei dawh hna thawh mek hi nimin khan Serchhip-a thuthar thehdarhtu thenkhat te chuan a hmunah tlawhin hnathawh tawh chin leh an hna thawh dinhmun te an zawtfiah a, he hna thawk mektu KRAM Infracon Pvt. Ltd. a General Manager Atul Kumar Singh chuan an hnathawh dinhmun lo hrilhin he Lei hi meter 150-160 vel-a thui tur a ni tih sawiin, Lei-ah hian a ruala Motor pahnih tlan theihna tur meter 7-a zau bakah a sir ve ve ah Ke-a kal theihna tur meter 1.5 ve ve, a vaiin meter 10-a zau in dawh tur a ni tih a sawi a, tunah hian Lei Foundation tur an khawih tan mek thu sawiin, Fur ruahtui tlak hma ngeiin Foundation chhun chu peihfel an inbeisei thu a sawi a. Tunah hian Lei chhim lama foundation pakhat zawk chu chhun zawh a ni tawh a, hmar lama foundation chhunna tur chu laih mek niin tun atanga hun reilote chhungin an khawih hman dawn tih a sawi bawk a. Foundation chhun hna an zawh hnu hian a Lei ruangawm tur chu khawih chhoh tan leh an tum thu sawiin, hemi atana kawr hnawhkhata leivung an chhung chungah a dona tur vel an siam mek thu a sawi a, helai hmunah hian hnathawktu mi 60-70 vel awm mekin Company lam atangin hotu lu mi 8 velin an thutchilh reng bawk a tih a sawi a, hnathawktu zingah hian tualchhung mi te pawh rawih an nih thu a sawi bawk.

Company hotute chuan hnathawh chungchangah harsatna liantham an tawh loh thu sawiin, an bungraw mamawh te pawh State pawn Guwahati leh Delhi lam atangin tluang taka an lakluh theih thu an sawi a, COVID-19 hri leng avangin harsatna tlem tlem an tawh thu sawiin, amaherawh chu inkhunghran hun an hman zawh hnuah tluang taka an thawh chhunzawm leh theih thin thu an sawi a. Rukruk leh boruak thalo dang awm thei ah pawh khawtlang hruaitute leh YMA te nen thawhhona tha tak neiin harsatna em em an tawh rihloh thu leh khawtlang hruaitute leh YMA te chungah pawh an lawm thu a sawi bawk a ni.

Tarlan tawh angin NH. 54 Serchhip by-pass road-a Lei dawh tur hian kum 2020 December thla atang khan hna thawh tan a ni a, Lei dawh chhunga hna thawhna tur hian lui kawr-ah tui luanna tur meter 140-a thui Hume Pipe chu phumin kawrh hi hnawhkhah a ni a, nikum May ni 22 khan Serchhip a thuthar theh-darhtu thenkhat te leh Serchhip Sub-Hqrs. YMA Vigilance & Monitoring Committee te chuan an lo tlawh tawh a ni.

NH. 54 Serchhip by-pass Road-a he Lei dawh tur hi Mizoram-a Lei sei ber ber te zinga tel tura ngaih a ni a, kawr chhuat atanga teh-a Lei sang ber turte zing ami a ni bawk. Tun dinhmunah hian Lei dawh hna tan tur hian thawktute pawh an thawkrip tawh hle a, hmanrua leh lirthei liantham tak tak bakah Cement Plant liantham tak leh thir lam khawihna tur hmun leh a khawih tur bikte pawh changtlung takin helai hmunah hian an inkhuar fel tawh a ni.