Damdawi In sakna sum ah lawmthu sawiin, NGO leh VC te’n an thlan ah sak ngei duh

Serchhip Thalai Pawl (STP) chuan Powergrid in CSR Fund atanga Khum 100 awm theihna Serchhip District Hospital sakna tur cheng vbc. 21 an pe dawn ta chu lawmawm an tih thu leh a hmun tur ah NGO Coordination Committee in an lo ruahman tawh, Bukpui ram chu tha an tih thu an sawi.

Nimin a thuchhuah an siamah Serchhip Thalai Pawl chuan Serchhip District mipui te'n an mamawh em em Serchhip District Hospital sak thatna tur chu Deputy Commissioner kalchhuak ta Kumar Abhishek-a leh sawrkar hotute hmalakna avangin, Powergrid chuan CSR Fund atangin khum 100 awm theihna sakna tur cheng vbc. 21 chu min pe dawn ta tih hriat a ni tih an tarlang a. Hetianga damdawi In sakna tur sum an nei ta chu lawmawm an tih thu sawiin, hemi chungchanga hma la tute chungah lawmthu an sawi a ni.

Serchhip Thalai Pawl chuan CSR Fund phalsak tawh hi Serchhip District Hospital khum 100 awm theihna tur sakna atana hman thuai a nih theih nan Company lam nen MoU te sign-a hma la thuai turin sawrkar chu an ngen a, District Hospital sakna hmun tur chungchang ah a hma lama NGO Co-Ordination Committee in ruahmanna an lo siam tawh, Bukpui ram chu tha an tih thu leh nakin zela kan khaw than zel dan tur ngaihtuahin helai hmuna Hospital lian awm hi a tha hle a an hriat thu an sawi a. “Serchhip in Damdawi In changtlung tak kan neih thuai theih nan, a rang lama hma la turin kan sawrkar hotute kan ngen tak meuh meuh a ni,” an ti bawk.

Hetihlai hian Serchhip NGO Coordination Secretary PC. Vanlalluna pawhin Serchhip District Hospital sakna tur sum hmuh a ni dawn ta chu lawmawm an tih thu sawiin, Serchhip NGO Coordination Committee leh Joint VC bakah Town chhunga VC tin ten Joint Meeting neia damdawi In sakna tur hmuna an lo thlan tawh, Bukpui-ah sak ngei a nih theih nan Vawiin a Serchhip-a rawn kal tur Health Minister hnenah an lo then dawn tih a sawi a. Hemi rual hian Serchhip in Hmeichhe lam thiam Doctor, Gynaecologist a neih loh chungchang pawh lo thlen an tum thu sawiin, Serchhip District Hospital-ah hian Gynaecologist Post a awm theihna turin an lo thlen dawn thu a sawi a ni.

Comments

Popular posts from this blog

Tukverh-a tlasual boral