Chanchin thar lawrkhawm :

Larsap in lawmpuina hlan

Asian University for Women, Chittagong, Bangladesh-a lut tura Syngenta Scholarship hmu Hmangaihzuali d/o H. Lalbiakthanga, Thingsul Tlangnuam chu nimin khan Mizoram Lasap Dr. Hari Babu Kambhampati leh a nupui Dr. Jayashree Kambhampati te chuan Raj Bhavan-ah thingpui in puiin Syngenta Company atanga Asian University for Women-ah a zirchhung, kum 5 atana a senso zawng zawng tur Scholarship a hmu chu chhuanawm an tih thu sawiin, duhsakna an hlan a. Larsap hian he Scholarship a dil dan te, University-ah Subject a zir tur te, a zir zawha a kal zel tum dan te leh an chhungkaw dinhmun te zawtin a zirna kawnga theihtawp chhuaha Mizoram tihmingtha turin a fuih a ni. Agriculture lam buaipuitu khawvel huap pawha company lian tak, Switzerland a hmunpui nei Syngenta Company hian Asian Women University-a lut tur zirlai 5 te chu an zirna senso man zawng zawng tum turin Scholarship a pe a, Hmangaihzuali bak midang 4 te hi Bangladesh mi an ni.

Vawk note man bithliah

Khawzawl-a District thuneitute, AH&Vety Department leh VC aiawh bakah Khawzawl Vawkpui Vulh Association te nimin-a thukhawm chuan an District-a Vawk note man tur bithliahin  rate hman mek Vawk note pakhat man Rs. 6,500/- aia sang lo tih chu Rs. 7,000/- aia sang lo ni turin an ti a, Rs. 7,000/- a hralh tur vawk note chu ni 60 tala upa nise tih a ni bawk. Khawzawl District-ah hian an ranvulh te hri danna pek runpui kalpui tum mek a nih avang leh ASF hri leng dinhmun la thlithlai a tul angin Vawk lakluh chu la khap chhunzawm tura tih a ni bawk.

DGP thar in hna rawn zawm

Mizoram DGP thar Devesh Chandra Srivastva IPS chuan nimin, Feb. 9, 2022 khan DGP mawhphurhna lain DGP Mizoram Office a luah tan a. DGP thar hian a Office ni hmasa berah hian Chief Minister leh Home Minister-te an Office-ah tlawhin a kawm nghal a ni.

PC in mipui bum tumna ah ngai

PC Party Thalai, Peoples' Conference Party Youth chuan Feb. 8, 2022-a Assembly Annex Conference Hall-a SEDP Executive Board thutk-hawmna kaihhruaitu Deputy Chief Minister Tawnluia'n SEDP chu mipuite chawikanna tur leh ram hmasawnna tur atana duan a nih thu a sawi chu thu belhchian dâwllo, mipuite bum tumna mai ah an ngai tih nimin khan thuchhuah siamin an tar-lang a. MNF sawrkar in SEDP kalpui a tum dan chu Zoram mipuite chawikan nan leh ram hmasawnna tur ni lovin, MNF Party mi leh sa thenkhatte vulhna hmanrua atan chauh an ruahman a ni tih chu an hmuhdan a nih thu an sawi bawk.

BJP in Assam CM Office bia

BJP Mizoram Pradesh chuan nimin khan thuchhuah siamin Mizoram leh Assam Chief Minister ten zanriah an kilhona-a an thlalak ah Silchar mi Abu Majumdar lo telve chungchang tunhnaia sawi lar ah nimin khan Assam Chief Minister Office an biakpawh thu leh Jyanta Malla Barua MLA, Secretary to CM chuan Abu Majumdar chu Assam CM Party zinga mi leh Assam CM Team hruai nilovin, Mizoram CM Party zinga mi a nih thu a lo sawi tih an tarlang a.  Mizoram Sawrkar chu Dan lova kuhva tawlh-rukna ah a in hnawmhnawih ngei a ni tih hei hian a ti chiang nia an hriat thu an tarlang bawk.

Duty din thar leh nise ti

Nimin khan Khawzawl District Disaster Management Authority chu an Chairman leh District Bawrhsap CC. Lalchhuangkima hovin DC Conference Hall-ah an thukhawm a, he huna tel te hian COVID-19 inkaihhruaina te keng-kawh tur leh mipuiten COVID-19 Appropriate Behaviour (CAB) tha zawka an zawm theih nan Khawzawl Town chhungah sawrkar hnathawk COVID-19 Executive Duty din thar leh nise an ti a. CAB chungchang inzirtirna neih dan tur hrang hrang relin, hri kai tam dan a zira Red, Orange leh Green Zone then dan tur pawh an sawiho nghal a ni. Khawzawl District-ah hian khaw 28 awmin an District-ah hian COVID-19 vanga boral mi 5 an awm tawh a ni.