Latest News

Session-ah ZLP leh CLP Member te thu tawh dawn

Mizoram Legislative Assembly Budget Session neih mekah ZPM leh Congress Legislature Party-a tel te chu Vawiin atang hian Session-ah an tel chhunzawm leh dawn.

Tunhnaia Ngaizawl kawng siamna sum chungchanga Assembly Speaker hming lang avanga heng Legislature Party-a tel MLA ten Speaker Lalrinliana Sailo kaihhruaina hnuaia Session neih loh an phut avanga thutkhawm-a an tel duhloh hnuah nimin khan ZPM rorelna sang, Political Affairs Committee chu Aizawl-ah an thukhawm a, Assembly Speaker Lalrinliana Sailo in dan kalhin contract hnaah sawrkar dinglai MLA ni chungin hlawkna a tel nia puhna Voice Record chu House Leader Zoramthanga’n rintlak loh nia a sawi chhuak chu ngun taka finfiahna awm te an thlirin he Voice Record hi siam chawp a ni lo tih khawtlang aiawh, mi zahkai (prominent citizen), NGO hruaitute'n an sawi nawn leh chuan he thu hi thutling leh ngaimawh tlak nia an hriat thu an sawi a. House Leader beisei ang ngeiin eirute chhuitu tur leh hrem theitu, Lok Ayukta-ah ZPM Party chuan chhuichiang turin a thlen tawh tih sawiin, Session hi hun pawimawh leh eptu ten rorelna hmun ngeia sawrkar khalhngil tura an auchhuahna hmun a nih avangin leh a thlangtu bial mipuite aiawhtu an nih ang ngeiin ni hnih lai an lo chhuahsan chu tawk tawha hriain an MLA te Session-a thu leh tawh turin an rel a ni.

Hetihlai hian MPCC Political Affairs Committee pawhin rorelna dik a awm theih nana theihtawp chhuah turin an MLA-te chu Budget Session-ah an tel zui leh dawn tih nimin khan thuchhuah siamin an tarlang bawk a. Assembly Speaker Lalrinliana Sailo in Khawzawl to Ngaizawl kawng laihna, Tender amount cheng nuai 820.33-ah hlawkna cheng nuai 100 a tel ve thu Voice Record a lo lang chu mak an tih thu leh, Mizoram Politics tibawlhhlawhtu lian takah an ngai tih sawiin, January 13, 2022 khan Central YMA-in Mizoram-a PMGSY kawng siam engemawzat an endikna ah Lalrinliana Sailo hming hi a lo lan tawh thu leh Khawzawl to Ngaizawl kawng bakah Khawhai to Tlangpuilian kawng laihnaah pawh a hming hi a lang tih an sawi a. Lalrinliana Sailo chuan Congress-a a awm lai atang tawh khan sum leh pai lama hmingchhiatna a ngah hle nia tarlangin, hetiang a nih avang hian MNF Party pawhin Press Release-te siamin, Total Bandh hial an buatsaih tih an sawi a. “House Leader, Chief Minister Pu Zoramthanga’n Khawzawl to Ngaizawl kawng siamna a cheng nuai 100 fanghma no eitu ni a mipuiin an ngaih Speaker hi a hum tak tlat avangin MPCC Political Affairs Committee rorel angin rorelna dik a awm theih nana theihtawp chhuah turin kan MLA-te chu Budget session-ah an tel zui leh dawn a ni,” tiin an thuchhuah ah chuan an tarlang a ni.

Comments

Popular News (Last 30 Days)