Lenkawl

Public Health Engineering Department Minister Prof. Lalnilawma’n Mizoram tlawh tura a sawm angin Israel Embassy-a International Development Co-operation (MASHAV) Senior Water Resources Specialist Neeraj Gahlawat leh Partnership and Operations Head Arpit KP-te chuan niminpiah khan Mizoram an lo thleng a, PHE Department Engineer-ten lo dawngsawngin Aizawl Water Supply Scheme en turin Tlawng lui-ah hruaiin tui supply hnathawh kalphung leh harsatna hrang hrangte an enpui a, Fur laia tuilian nasa leh tui chim chin sang lutuk te, tui nu (turbidity) sang lutuk te, Thal laia tui kam nasa leh silt deposit (siltation) chungchang te an sawiho nghal bawk a ni.

Mizoram Pradesh Congress Committee (MPCC) chuan sawrkar laipuiin Foreign Contribution (Regulation) Amendment Bill 2026 a chhawpchhuak chu Kristian-te nekchepna hmanrua a nih avangin a tawp thlengin an dodal dawn tih sawiin, tun thla ni 21 khian 'Black Day' hman an tum thu an sawi.

Nimin khan Aizawl-a Secretariat Conference Hall-II ah ‘Study Committee on KMMTTP (Kaladan Multi Modal Transit Transport Project) and Railway line between Bairabi and Sairang’ chu an Chairman, T. Lalhlimpuia MLA hovin an thukhawm a, Department hrang hrang Secretary te telin sawm a nih angin Mizoram Youth Commission Chairman Malsawmzuala Ralte chuan a telpui bawk a, Study Committee hmalak tawhna hrang hrangte report a nih bakah KMMTTP zirchianna neih meka West Bengal tlawh atanga thil hmuh leh Mizoram tana hmalak theihna awmte ngaihthlak a ni a, SIRD-in Bairabi leh Sairang inkar Rel kawng-in mipui a nghawng dan, Social Impact Assessment an neih zawh tak report pawh ngaihthlak niin Sairang leh Bairabi inkar hma-sawnna tur chhawpchhuahte pawh thlirho a ni bawk.

National Bank for Agriculture and Rural Development (NABARD) Mizoram Regional Office chuan nimin khan an dinchampha 'Foundation Day' vawi 45-na chu an Office Conference Hall-ah an lawm a, Food, Civil Supplies leh Consumer Affairs Minister B. Lalchhanzova chuan a telpui a ni.