Synod Hospital, Durtlang-ah Health Minister in 800 LPM Oxygen Generation Plant a hawng

Health Minister Dr. R. Lalthangliana chuan nimin khan Synod Hospital, Durtlang-ah 800 LPM Oxygen Generation Plant a hawng a, “Hri kai nunna chhan kawngah pawh kan thawhrimna malsawmin a awm a ni,” a ti.

Program for Appropriate Technology in Health (PATH), Seattle, USA leh GiveIndia ten an rawn pek leh Synod Hospital-a bun tak 800 LPM Oxygen Generation Plant hawnna hunah hian Health Minister chuan Synod Hospital in PSA Oxygen Plant 800 LPM an nei chu lawmawm a tih thu sawiin, Mizoram-ah chuan a lian berte zing a mi a nih thu leh damlo na zual leh Oxygen mamawhtu ten dam nan an hman ngei a duhsak thu a sawi a. COVID-19 in harsatna tam tak min siam sak karah kan neih phak loh leh kan hmelhriat loh bungrua leh hmanraw tam tak kan neih phah tih sawiin, “Kawng lehlamah chuan COVID-19 hripui leng karah Pathian in mal min sawm a, hri kai nunna chhan kawngah pawh kan thawhrimna malsawmin a awm a ni,” a ti bawk.

Health Minister chuan Synod Hospital chu Mizoram-a damdawi In hlun ber pakhat a nih bakah kum 94 hmel a hmu ta chu lawmawm a tih thu pawh sawiin, Mizoram chhung mai bakah Mizoram pawn hmun hrang hrang atang pawha an pan, damlo retheite leh harsa tak takte pawhin an belh thin a ni leh an thlamuanpui a ni chu ropui a tih thu a sawi a, “Pathian in he damdawi in hi mal a sawmin a awmpui tih a chiang a ni,” a ti bawk.

Corporate Social Responsibly (CSR) kaltlanga sak Mamit District Hospital chu sak zawh thuai beisei a nih thu pawh Health Minister chu8an sawiin, Serchhip District Hospital sak thatna tur cheng vbc. 21 leh Kolasib District Hospital sakna tur cheng vbc. 22 hmuh a nih tawh thu leh reilote ah hna tan theih inbeisei a nih thu a sawi bawk.

Nimin-a hawn tak 800 LPM Oxygen Generation Plant hi Program for Appropriate Technology in Health (PATH), Seattle, USA leh GiveIndia ten an rawn pek niin Oxygen Plant atana senso zawng zawng hi Google Company in an rawn tum thung a, nimin-a a hawnna ah hian PATH aiawha rawn kal Nilesh Gangware, Operation Manager chuan Technical Report pein Synod Moderator Rev. Dr. Vanlalnghaka Ralte-in Pathian hnenah hlanna hun a hmang a, Dr. John Malsawma, Medical Superintendent, Synod Hospital in lawmthu a sawi bawk a ni.

Comments

Popular posts from this blog

Tukverh-a tlasual boral