MLA Fund hmanga Tuisen zau panna laih thar MJA (SD) ten a hmunah an tlawh

Serchhip Mat Phai Tuisen Zau-a MLA Fund hmanga kawng laih thar chu Inrinni (Feb. 19, 2022) khan MJA Serchhip District Member te chuan tlawhin hnathawh an enpui a, helai vela thlai chingtute chuan he kawng thar siam avang hian thlai thar phurhchhuah kawnga harsatna an tawh thin chu sutkian a nih an beisei tih an sawi a ni.




Serchhip Mat Phai-a Tuisen Zau-ah hian C. Khuangawia ram leh Tlangmawia ram inkar-a kawng, Zote South khaw panna kawng ni bawk hi Fur laiin Mat lui lian in a chim nasat thin avangin lirthei leh mihring tan kaltlang hleih theih a ni thin lova, helai kawng hi kawng awmsa aia sanga sawn turin Serchhip Bialtu MLA Lalduhoma chuan MLA Fund atangin cheng nuai 8 a pe a, he sum hmang hian Serchhip Welfare Committee chuan kawng siam hna hi thawkin Inrinni khan an hnathawh hi an zofel thawkhat tih helai hmuna hnathawktute chuan an sawi a, he kawng an laih nan hian helai a ram neitu C. Khuangawia (Dinthar Veng), Tuahkimi (Dinthar Vengsang) leh Tlangmawia (Saron Veng) te chuan sum leh pai engmah beisei lovin an ram an pe tih an sawi a, an chungah an lawm hle tih an sawi bawk a ni.

Helai kawng siam hna thawktute chuan an kawng siam hi meter 500 aia thui a ni tih sawiin, a sang lai ah chuan kawng hlui aia a sanna hi ft. 10 chuang te a ni tih an sawi a, hmun thenkhat ah phei chuan lung inthuahthip a nasat avangin laih a harsat thu leh lung halna te pawh hman a tul thu an sawi a, hei bakah hian kawng tantlang-a tuikawr awm te pawh Inrinni khan GSB hmanga chhungin hnatlang an nei tih an sawi bawk.

Helai hmuna ram neitu C. Khuangawia chuan helai hmunah hian tuilian avanga harsatna an tawh thin thu MJA Member te hnenah hian sawiin, Awm thleng vela tui hian a chim thin thu leh Fur-ah tuilian avanga an kal theihloh bakah Thal-ah pawh kawng diak avangin an thlai tharchhuah phurhchhuah kawngah harsatna an neih thin thu a sawi a, hetianga kawng siam thar a nih hnu hi chuan Fur leh Thal ah harsatna tawk tawh lo tura an in ngaih thu an sawi bawk.

Helai hmuna hnathawktute chuan helai kawng an laih bakah hian a tira ruahman-a tello, Chawm Kai bula leitan chu an rawthniam bawk tih an sawi a, helai hmunah hian kawng hi mual pawng-a inbang a nih avanga chhuk chho a nih avangin ruahtui a tlak hlek chuan lirthei a kal leh Motor a kal ten harsatna an tawh thin thu an sawi a, hei vang hian kawng hlui aia ft. 4 vel zeta hniam turin kawng hi rawt hniam a ni tih an sawi a, hei bakah hian kawng khuar zual hnawh leh siamthatna atan Granular Sub Base (GSB) trip 20 (meter 100) chuang zet an hman thu pawh an sawi bawk a. Hetianga bialtu MLA in kuthna-thawktute tana MLA Fund atang sum a ruahman sak chu an lawm hle tih an sawi bawk.

Tarlan tawh angin nikum lam khan Serchhip bialtu MLA Lalduhoma’n MLA Fund a pek hmang bawk hian Lumtui Zau atanga Chamdur thleng chu cheng nuai 1.5 hmangin siam a lo ni tawh a, Chawm kai atanga Taipuia Leilet inkar pawh MLA Fund cheng nuai 1.5 seng bawkin nikum khan siam a lo ni tawh bawkin tuna kawng an siam leh laih thar hi Taipuia Leilet atanga peng, Zote South panna kawng ni bawk a ni.

Comments

Popular posts from this blog

Tukverh-a tlasual boral