Chanchin thar lawrkhawm :

DC leh SP te hriattir

Task Group on Monitoring of CAB & CO-VID-19 Restrictions chuan District tina Deputy Commissioner leh Superintendent of Police te hnenah nimin khan lehkha thawnin February ni 1 - 15, 2022 chhung hian ‘COVID-19 CAB No Tolerance Drive’ khauh taka kalpui turin a hriattir a, District Administration, Police leh VLTF/LLTF etc., te chu theihtawp chhuaha tangho a hma la tura hriattirin, District tina Disaster Management Authority te chu an bial chhungah Executive Duty te tuai thar leh turin a hriattir bawk. Heng bakah hian LLTF/VLTF te kaihhruaina hnuaiah khua/veng tinah an bial chhunga CAB khauh taka zawm a nih theih nan CAB Implementation Committee din tura ngen an ni bawk a, inkhawmnaah CAB tha taka zawm a nih theih nan Kohhran tinte hnenah CAB Implementation Committee din turin a ngen bawk a ni.

AKAM Programme hmang

National Bank for Agriculture and Rural Development (NABARD) buatsaihin nimin khan Lunglei DC Conference Hall-ah Azadi Ka Amrit Mahotsav (AKAM) Programme hman a ni a, he hun hi Lunglei DC Kulothungan A chuan hman-puiin kuthnathawktute leh mahni kutkawiha eizawngte dinhmun chawikang tura NABARD hnathawh chu a ropui takzet a ni tiin, Bank-te leh Line Department-te nena thawhhona tha tak an neih pawh chhawmnung zel turin a chah bawk. He hunah hian NABARD leh Bank hotute bakah Line Department leh tlawmngai pawl te telin NABARD hmalakna te ngaihthlak a ni.

Kawngpui siamtha mek

Kawnpui-Durtlang-Aizawl Road Black topping hna chu 74 Road Construction Coy (GREF) ten an thawk mek a, hei vang hian Sih-phir lam atanga Aizawl lam pan a kal te chu Sihphir Vety By-Pass Road atanga Zuangtui/Thuam-pui kawnga kal tura tih an ni a, Bawngkawn lam atanga Durtlang lam pan te chu Main Road-ah kal tur a ni ang.

ZPM in vanduaithlak an ti

ZPM Thalaite chuan Mizoram sawrkârin hripui leh lockdown  avânga Tam tuarte tanpuina hna LLTF hnenah papek-a chhawmdawlna hna thawh kawnga a kut a sil hnuah, Burma atanga kan unau râltlânte chhawmdawlna kawngah a kut sil-a Village/Local Level Committee on Myanmar Refugees a din chu hriatthiam harsa an tih thu sawiin, mipui harsatna-te mahni mawha la ngam lo sawrkâr kan nei chu vanduaithlak an tih thu an sawi.

BJP in hriatthiam har ti

BJP Mizoram Pradesh Thalaite chuan Mizo-ram Sawrkarin Myanmar atanga Kuhva lakluh chhiah/Tax a lak dan Home Minister Lalcham-liana sawi leh Taxation Department Official sawi inang lo chu hriatthiam har an tih thu an sawi a, “Sawrkar hian dan pawisakna neilo in sumdawnna a kalpui a, hemi chungchanga mawhphurtu hi Chief Minister Zoramthanga a ni,” an ti bawk.

P&E Dept. thawktu enfiah phut

PC Party chuan Mizoram sawrkarin Power & Electricity Department-ah thawktu mamawh aia tam mi 973 a chhawr avanga kan thla tin Electric bill a pun phah ngawt mai chu hriatthiam harsa an tih thu nimin khan thuchhuah siamin an tarlang a. Mizoram sawrkarin P&E Department-a thawktu mamawh zat a siam (Sanction post) 2,140 a nih laiin thawktu mi 2,958 lai mai ten thawk leh si in, mamawh miah loh mi 808 chhawr an nih bakah Diesel/Gas atanga Power siam-chhuah kan neih miah loh laiin hemi buaipuitu tur mi 165 tul miah lova rawih te nen an vaiin mi 973 an ni tih an sawi a. Heng mi 973 te thlatin hlawh hi mipuite bill tlingkhawm atanga pek a nih avanga kan thlatin Electric Bill pung zelin mipuite phurrit min belhchhah tam tial tial tih hriaa enfiah turin P&E Minister chu an phut bawk.