Kolasib Dumlui-a Chakai Farm kalpui mek Fisheries Minister hovin tlawh a ni

Cheng nuai 52 senna Project, Kolasib Dumlui-a Chakai Farm kalpui mek chu nimin zing khan Fisheries Minister K. Lalrinliana hovin Kolasib-a thuthar thehdarhtute chuan an tlawh.

Nimin-a Chakai Farm tlawhna ah hian Fisheries Minister chuan Mizote ngainat Chakai-ah intodelh tura hmalak chhinna atan Chakai Farm chu kalpui a nih thu sawiin, Chakai chu sa zawng zawngah a man to pawl tak a nih thu leh Market lamah harsatna a awm loh thu a sawi a. “Rs. 300/- man hi a sa la chhuak vek ila, vei khat emaw lek chauh a ni. Tuna kan khawi dan ang tak hi India ram hmun dangah pawh tih ala ni ngai lova, keimahni kut chhuak, kan ruahman chhin a ni a, a hlawhtlin ngat phei chuan State dang pawhin an la rawn entawn tur a ni,” tiin hmalakna chu National Fisheries Board-ah pawh thlen a nih thu a sawi a. “Lui Chakai an ni a, hmun bika khawi hian eng ang chiahin nge an dam khawchhuah theih tih pawh kan hre lova, chu chu enchhin mek a ni,” tiin Chakai Farm chu mualpho pui huamin Project siam a nih thu a sawi bawk.

Luidung humhalh chungchang pawh nasa zawkin an kalpui dawn tih Fisheries Minister chuan sawiin, tuna Mizoram in luidung humhalhna tura dan a neih mek, 'The Mizoram Fisheries (Amendment) Act 2016' chu siamthat belh zel niin tun Budget Session-ah pawh Rules thenkhat belh ngai belh tura putluh a nih dawn thu a sawi a. Luidung humhalh chungchangah hian Sialsuk leh Samlukhai velah khawtlang mipuite hmalakna chu fakawm a tih thu pawh sawiin, Department pawhin an enpui tawh thu a sawi a, “Chakai note man an phal lova, hei vang hian an inthlahpung tha. Khilai tlangdung khi Chakai-ah Aizawl Bazar chawmtu ber an ni a, Market chiangsa leh tha em em a ni,” a ti a. Central atangin Mizoram chuan Kaikuang-ah pawisa tam tak a dawng tawh tih sawiin, sum sen a tam tawh viau laiin Kaikuang vulh hlawhtling an la awm lo tih a sawi a, “Chakai pawh kan enchhin a ngai a ni,” a ti bawk.

He hunah hian Kolasib District Fisheries Development Officer Lallianpuii chuan Chakai Farm chu experiment tihna atan chauh la kalpui niin a hlawhtling dawn em tih hriat ala ni lo tih a sawi a, tharchhuah awm nghal zut zut tura beisei chi a nih rih loh thu leh Demonstration Farm ang chauh a nih thu a sawi a. DFDO sawi danin Chakai hian nisa ni lo, temperature pawh 25°C to 30°C velah an mamawh a, hei vang hian luiluang ni lovah khawi theih a ni em tih hre turin enchhinna hi kalpui chhoh mek a ni.

Chakai Farm hi Mizoram sawrkarin SEDP kaltlanga Pilot Project atan a din niin Laldingliana, Kolasib Vengthar te huan ramah enchhinna hi neih a ni a, April 2020 atang khan bultan niin tun thlengin cheng nuai 32 vel sen a ni tawh bawk a. Compartment hrang hrang siamin Chakai hi chi (variety) hnih — Aikam leh Aifiar dah a ni a, Chakai lian zawk Tuiruang atangin lak tum mek a ni bawk a. Hriat theih chinah Chakai te hi a pui 600 vel an awm mek a ni.