Sihhmui Check Gate-ah Duty dahin Serchhip-a Check Gate siam thar Vawiin ah hawn tum a ni bawk

Dân lova Kuhva tawlhruk dàn nan leh a ti lui te lo manna tur atana ruahman Sihhmui-Sairang Zero Point bula Check Gate siam chu hman tan niin Serchhip Sailiamkawn a mi pawh Vawiin hian hawn a ni ang.

Hemi chungchangah hian Central YMA chuan thuchhuah siamin Central YMA in Sawrkar hotute hnena dân lova Kuhva tawlhruk dàn nan leh a tilui te lo manna tur Check Gate rintlak tak siam tura a ngenna tih hlawhtlin nana siam, Sihhmui-Sairang Zero Point bula Mizoram Police Check Gate siam thar ah hian tunkar Thawhtanni zan atang khan Duty tan a ni tih an tarlang a ni. Tunkar Thawhlehni khan Central YMA hruaitute chuan Mizoram Police hotute nen helai hmun hi tlawhin, Central YMA President R. Lalngheta chuan Mizoram Sawrkar hmalakna chu lawmawm an tih thu a sawi a. Rang taka an ngenna an tih hlawhtlin vat avangin Mizoram Sawrkar hotute chunga an läwm thu a sawi a. Mizoram Police-te chu YMA ten he sumdawnna dik lo tak tih tawpna kawngah hian theih tawpa hma an lak pui tlat tur thu Central YMA Gen. Secretary Prof. Lalnuntluanga chuan a sawi bawk a ni.

He hunah hian Mizoram Police-a DIG (Hqrs.) Lalbiakthanga Khiangte chuan he Check Gate kalphung tur leh enkawla vil reng turin Sairang Police Station te chu ruat an nih thu leh hemi avanga Sairang PS chu an thuamthat thu sawiin, thawktu pawh an pek belh a ni tih a sawi a, changtlung zawka la thuam belh zel an tum thu a sawi bawk.

Thudawn danin Mizoram Sawrkar aiawhin Mizoram Police hotute leh Central YMA hruaitu te hian Dan lova Kuhva tawlhruk danna tur Check Gate thar Sailiamkawn, Serchhip daia siam thar chu Vawiin hian an hawng leh dâwn bawk a ni. Tarlan tawh angin, Central YMA OB-te chuan February 4, 2022 khan Home Minister chu a Pisa-ah kawmin, ram páwn khawchhak lam atanga dan lova kuhva rah tawlhrûk tihtawp dan tur sawipuiin Kuhva tawlh rûk enfiahna leh danna atana Check Gate siam belh leh tihchangtlun chungchang an sawipui tawh a ni.