Union Minister of State for Health & Family Welfare in Mizoram a rawn tlawh mek

/

Union Minister of State for Health & Family Welfare Dr. Bharati Pravin Pawar-i chuan Mizoram rawn tlawh mekin Vawiin hian New Delhi a pan ang.

Inrinni-a Mizoram-a rawn thleng Dr. Bharati Pravin Pawar hi Lengpui Airport-ah Tourism Minister Robert Romawia Royte; Health & Family Welfare Board Vice Chairman Dr. ZR. Thiamsanga leh MLA Dr. BD. Chakma bakah Health Secretary Lalramnghaka ten lo dawngsawngin Inrinni vek khan Chief Minister Zoramthanga chu a chenna In-ah hmuin Health Services chungchanga Mizoram mamawh leh hmalakna te an sawidun a. Chief Minister chuan Mizoram in hriselna lama harsatna hrang hrang an neih te leh inenkawlna tihchangtlun kan mamawhna te a sawipui a. ZMC tihchangtlun belh dan tur te leh Specialty Hospital Mizoram in a mamawhna te a sawipui bawk. Mizoram mai bakah State thenawm leh ramri a tawmpui ram pahnih a awmte tan pawha tangkaipui theih khawp a Healthcare Service tha siam a duh thu a sawi bawk. Union Minister chuan Mizoram chu kawng hrang hrangah hmasawn tura theihna, potential tha tak a nei a ni tih a hmuh belh zel thu sawiin, hriselna tihhmasawn leh inenkawlna tichangtlung tura Mizoram tan theihtawp a chhuah tur thu a hrilh bawk a ni.

Union Minister of State for Health & Family Welfare Dr. Bharati Pravin Pawar hian Inrinni tlai khan Hmarchhak-a Nursing leh Paramedical Sciences zirna hmunpui, Ministry of Health & Family Welfare hnuaia awm RIPANS chu tlawhin Ministry in cheng vbc. 480 vel an ruahman hnuaia hmalakna thenkhata hmun a en bawk a. Union Minister of State for Health & Family Welfare chuan khawvel pumpuia Medical leh a kaihhnawih mithiamte an indaihlo nasat thu sawiin, COVID-19 hri lengin he indaihlohna hi a tizual niin a sawi a. India chu ram thang chak pawl tak niin Medical leh a kaihhnawih zirna lamah khawvel el pha turin Sawrkarin ruahmanna siamin a buaipui mek tih sawiin, RIPANS tihchangtlunna project chu Hmarchhak tan thil tha tak a nih a beisei thu a sawi a, RIPANS kalzelna turah duhsakna a hlan bawk.

RIPANS-ah hian Dr. Bharati Pravin Pawar hi Director leh Staff ten lo dawngsawngin RIPANS chanchin tlangpui leh RIPANS tihchangtlunna hnuaia hmalakna thlen chin te chu RIPANS Director, Dr. H. Lalrinmawia’n a lo hrilhfiah a, Health & Family Welfare Board Vice Chairman leh Covid-19 Medical Operational Team Chairman Dr. ZR. Thiamsanga chuan Minister chu lo lawmin Mizoram hriselna dinhmun tlangpui a hrilh bawk a ni. RIPANS tihchangtlunna tur project ah hian khum 100 leng damdawi In sak te, Hostel leh Academic Block sak te, Master Course engemaw zat hawn te a tel a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »