Inbumna ah fimkhur turin chah

Mizoram Police te chuan Online inbumna chungchangah mipuite chu fimkhur turin an chah.

 Hemi chungchanga thuchhuah an siamah Mizoram Police chuan tunhnaiah internet kaltlanga inbumna a hluar hle tih tarlangin, heng inbumna hrang hrang zingah hian Armed Forces Officer/Sipai anga inchhal, an thlalak, I.D., etc. daha mi bum ching an tam thu leh heng mite hian bungraw hrang hrang- motor, bike, inchhung bungrua te zuarin, a man an dawn hnuah an bungraw zawrh te a leitu hnen thlen lovin an bibo thin tih an tarlang a. Hei bakah hian heng mi bum chingte hian sipaiho tana eitur (Sangha, Sa chi hrang hrang leh thildang) order derin a zuartute an bum thin thu leh an order man pekna turin a zuartute hnenah QR Code Scan tirin a zuartute pawisa an lakchhuah sak thin tih an tarlang a.

Tunhnaiah internet sumdawnna mi tam takin an kalpui mek thu leh heng online kaltlanga sumdawnna (Instagram, Facebook, Whatspp business) zingah hian dik taka kalpui tam tak an awm laiin, misual thenkhat mi bum tuma hetiang sumdawnna kalpui an awm mek tih hriat a tul thu tarlangin, heng sumdawnna kaltlanga bungrua kan lei/chah hmain a dawr tawhtute comment atangin a rintlak nge rintlak loh hriat tum te, a dawr neitute leh pawisa pekna tur account hming/address a inmil em tih enin bungrua a man pangngai aia tlawm uchuak lutuk a zawrhte chu inbumna a ni duh tih an tarlang a. “Kan account a pawisa lo lut turin six (6) digit UPI PIN GPay, BHIM emaw ah pek a ngai lova, heng PIN pek ngai titu chuan bum a tum che tih hriattur a ni,” an ti bawk.