DRO Office atangin Birth Certificate 371 pechhuak

Kum kalta (2021) chhung khan Serchhip a District Research Officer (DRO) Office atangin Birth Certificate 371 pekchhuah a ni.

Economic & Statistic Department hnuaia DRO Office, Ser-chhip atanga thu kan dawn danin nikum (2021) chhung khan Serchhip District-ah Registrar of Births & Death 49 awmin a hun taka naupiang ziahluh loh ten Delayed Registration an tih atangin Birth Certificate 113 pekchhuah a ni a, hei bakah mi 258 te chu chhan hrang hrang avangin Birth Certificate pekchhuah nawn (re-issue) an ni bawk. 

Thudawn danin Serchhip District chhunga nau piang te chu an pian atanga ni 20 chhungin a thlawnin an Veng leh damdawi In a RBD te hnen atangin Birth Registration tiin Birth Certificate hi an la thei a, hemi chhunga la hmanlo tan ni 21-31 chhungin DRO Office-ah phalna la in Rs. 10/- chawiin Registration hi tiin Birth Certificate lak leh theih a ni bawk a, nikum chhung khan January atanga November thla thlengin (December thla report ala lut kim lo) Serchhip District-ah mi 614 ten Birth Certificate hi an la a, hemi hun chhunga la lo te chuan an la leh duh a nih chuan sum tam zawk sengin Delayed Registration an tih a ngai tawh thung a ni.

Chhinchhiahna atanga nikum a Registrar of Births & Deaths atanga Birth Certificate lachhuak 613 te zinga 174 te hi thingtlang a piang an ni a, midang 440 te hi khawpui a piang an ni a, naupang te zinga 330 hi mipa an nih laiin 284 chu hmeichhia an ni.

Nikum chhung vek khan Serchhip DRO Office atang hian mitthi 26 chhungte hnenah Death Certificate pek niin chhan hrang hrang avanga Death Certificate re-issue 25 a awm bawk a. Death Certificate pawh hi mi a boral atanga ni 20 chhungin a thlawna lak theih a nih laiin ni 21-31 chhung chuan DRO Office atanga phalna lak a ngai a, hemi hnu lamah hi chuan Delayed Registration tih a ngai tawh thung a ni.