Chanchin thar lawrkhawm :

ATM-a harsatna sawiho

Lawngtlai khawpui chhunga ATM khawl indaihloh avang leh khawl chhia a awm fo avanga mipuiin harsatna an tawh thin chungchang chu nimin khan Lawngtlai DC Andrew H. Vanlaldika hovin sawrkar mi pawimawh leh tlawmngai pawl ten an sawiho a. Khawl awmsa in mipui a chawm zo tawh lo deuhva a lan avangin a dang dah belh a nih theih nana hmalak te, Power Supply su-in khawl a tihchhiat thin chinfel dan tur te, mipuiin a hman dan an thiamloh avanga khawl chhia awm thin ven nana mipui-a zau zawka ATM hman dan zirtirna vawrhdarh te leh hmasawnna tur kawng hrang hrangte sawiho leh rel a ni. Lawng-tlai khawpui chhungah hian tun dinhmunah ATM hi pali (4) a awm mek a ni.

Special Handloom Expo nei

Sawrkar laipui Ministry of Textile-a Development Commissioner for Handloom bultumin Mizoram Apex Handloom & Handicraft Cooperative Society Ltd. (MAHCO) chuan nimin atang khan tun thla ni 28 thleng awh turin Lunglei Chanmari YMA Hall-ah Lunglei Special Handloom Expo an buatsaih a, he Expo hi Mizoram State Cooperative Societies-a Registrar Lalrinsanga chuan a hawng a ni. Lunglei Special Handloom Expo-ah hian dawr 20 hawn niin Mizo kutchhuak thawmhnaw chi hrang hrang bakah ipte leh bag chi hrang hrang man tlawm zawka lei theihin phochhuah a ni.

Children’s Science Congress

Kum 1993 atanga buatsaih National Chil-dren’s Science Congress chu a vawi 29-na atan nimin khan Virtual (Online) hmangin neih tan a ni a, tun thla ni 18 thleng a awh ang. National Children’s Science Congress-ah hian India ram State leh UT leh ASEAN Countries atangin Child Scientist 683 te Research Project (Zirchianna) hmangin an intihsiak a, Mizoram atang pawhin zirlai mi 8 telin nimin khan an Project an entir a ni. Kum 1993 atanga he inelna neih ah hian Mi-zoram atangin mi 290 an tel tawh a ni.

A huho-a chawlh lak tum

Provision Employee's Association of Mizo-ram (PEAM) thutkhawm hmanhmawh nimin a neih chuan Austerity Measure hmanga sawrkar in an hamthatna a danna chu ala phelh loh avang leh an intunnun ve na tur (NPS zulzui) nei tura hma lak sak loh avangin tun thla ni 17 leh 18-ah te Mass Casual Leave lak nise an ti a, harsatna awm thei chungchangah Department hotute leh mipuite hriat-thiamna an dil thu an sawi bawk.

Mizoram Governor sawipui

India zalenna kum 75 tlin lawmna, Azadi ka Amrit Mahotsav denchhenin Biker 75 tan India Hmarchhak fan chhuahna hun, ‘North East on Wheels’ huaihawt a ni dawn a. He tour hi India hmarchhak chhunga chengte hriatchian lehzualna atana buatsaih niin a huaihawttu Amazing Namaste Foundation hruaitute chuan nimin khan Mizoram Governor Hari Babu Kambhampati chu hmuin an ruahmanna te an sawipui.