Sailiamkawn-a Police Check Post siam thar tunkar chhungin hman tan tum a ni

Khawchhak atanga Mizoram-a bungrua rawn lut te lo enfiahna tura Serchhip Chhim lam kawtchhuah Sailiamkawn-a Police Check Post tur sak hna chu zawhfel thawkhat niin tunkar chhung hian hman tan tum a ni.

Mizoram sawrkar in khawchhak lam atanga Mizoram-a bungrua rawn lut zinga Dan phalloh thil rawn lakluh te a awm leh awm loh lo enfiahna tura an ruahman, Serchhip Sailiamkawn-a Police Check Post tur sak mek hi nimin khan Serchhip-a thuthar thehdarhtu thenkhat te chuan a hmunah tlawhin hnathawh tawh chin leh an hmalak dan te an zawtfiah a, helai hmuna hnathawh viltu Serchhip SP Office-a Reserved Officer, Ispr. H. Biakchhuma chuan helai hmuna Check Post siam tur hian Union Home Ministry atanga sum lo kalin Mizoram Police Hqrs. in Estimate te siamin Departmental Works-a hna hi thawh a nih thu a sawi a. Check Post siamna atan hian Serchhip Darnam VC ten ram pe in nikum (2021) October 18 khan a hmun lai-a hma an lak tan thu leh November thla tir atangin a Building hi sak a nih thu a sawi a. A ban bul hi RCC hmanga siam niin Assam Type-a chhunzawm a ni a, a dung leh a vang ft. 18 ve ve niin helai hmun ah hian Check Gate siamin bungraw phur lirthei te chu lo enfiah thin a ni dawn a ni.

Serchhip Police hotute chuan he hna thawh hi nimin, Feb. 15, 2022 khan zawhfel a ni dawn tih sawiin, tunkar Ningani (Feb. 17, 2022) atangin hmang tan thei turin ruahmanna an siam tih an sawi a, helai hmun ah hian nitin darkar 24 chhung Duty awm tura ruahman a nih thu leh thawktu mi 4, Havilder pakhat leh Constable pathum awm tura ruahman a ni tih an sawi a, Duty te hian a hmunah an riahchilh thei dawn tih an sawi bawk.

Helai hmun hi Serchhip khawpui heltu National Highway rawn chhuahna tur niin helai hmun hi Serchhip khawchhung lam, Thenzawl leh Keitum panna kawng intawhkhawma tur a ni dawn a, tunah hian a kawt-a leivung la awm chu thenfai la ni lovin hei hi Vawiin lamah thenfai theih an beisei thu pawh an sawi bawk a. A chhak lam hi a awih deuh avangin a dawlna siam a tul thu pawh Police hotute chuan sawiin, tunah hian sum an neih tawh loh avangin an theih ang anga sum an dap belh leh mek thu an sawi bawk a ni.

Mizoram Police te hian hmun hnih- Serchhip Sailiamkâwn leh Sihhmui-ah Check Gate an siam belh mek tih hi Home Minister Lalchamliana chuan tunhnai khan thuthar thehdarhtute hnenah a lo sawi tawh a, “Check gate pahnihte hi siam zawh an ni tep tawh. Siam zawh a nih hunah chuan Kuhva rah bakah dan phal loh thil dang chi hrang hrangte phur an awm leh awm loh endik thin a ni ang,” a ti a ni.