Mizoram-a COVID-19 hri kai hmuhchhuah chuan hniam lam ala pan thei tak tak lova. Niminpiah khan Sample 3967 enfiah leh niin hri kai 317 zet hmuhchhuah leh niin Sample enfiah atanga za zela 7.99 te chuan hri an kai a ni.
Mizoram sawrkar in a din State Level Special Investigation Team (SIT) on Forest Fire chuan nimin khan Serchhip District rawn tlawhin kumin Thal chhunga kangmei chhuahna hmun te an tlawh a, kangmei chhuah thin dan leh hemi kawnga hmalak dan leh hmalak zel dan turte District thuneitute leh khawtlang hruaitute nen an sawiho a ni.
BJP Mizoram Pradesh chuan nimin khan Indian Medical Association (IMA) Mizoram Branch leh Upper Republic Local Council te hnenah Oxygen Concentrator leh PPE Kit an hlan.
MNF Thorang Block I leh II te chuan an bialtu MLA, Zodintluanga MLA Fund hman danah Thorang Bial chu engah mah a ngailohzia leh a hmuhsit zia a lang chiang niin an sawi.
COVID-19 hri leng mek lo hmachhawn tura inbuatsaihna atan Lungpho-ah Community Covid Care Centre (4C) siam a ni a, nimin khan khawtlang mipui ten hnatlang neiin bialtu MLA leh Assembly Deputy Speaker, Er. Lalrinawma chuan helai hmun hi a tlawh a ni.
Nimin khan Health Minister Dr. R. Lalthangliana hovin Mizoram-a COVID-19 Second Wave thawk mek chungchang thlirhona neih a ni.
Serchhip District NGO Coordination Committee hruaitute chuan nimin khan Serchhip District Medical Superintendent, Dr. ZD. Lalmuan-awma hmuin Serchhip District Hospital atanga tunhnaia Doctor sawnchhuah chu lo chhuahtir rihlo turin an ngen.
Nimin khan Serchhip District-ah COVID-19 hri kai mi 2 hmuhchhuah niin nimin khan hri kai mi 35 enkawl dam an ni thung.