Home Minister in Cyber Crime hnuhma chhuina tur ‘Cyber Forensic Lab’ a hawng

Home Minister Lalchamliana chuan nimin khan Directorate of Forensic Science Laboratory-ah Cyber Forensic Laboratory bun thar chu a hawng.

Cyber Crime hnuhma chhuina tur Cyber Forensic Laboratory hawnna hunah hian Home Minister chuan tunlai khawvel thang chho mekah Technology in nasa taka hma sawnin thiamna leh hmanrua te chu a changkan tawh thu sawiin, heng te hi kan khawsak ti nuamtu leh puitu, tangkaina tam tak nei an nih rualin a diklo zawnga hmang leh pawikhawihna atan hmang thin an awm chho ta niin a sawi a. Cyber Crime avang hian mi tam takin an pawisa khawl sa te an hloh a, an thlalak leh mimal nun te phawrh mualphoa awmin an Data pawimawh tam tak misual kutah te a lut thin tiin a sawi a. Cyber Forensic Laboratory kan neih thar ah hian Cyber Crime chungchanga hnu chhuinaah nasa takin min pui thei dawn nia a lan thu sawiin, “Mobile Phone leh Computer atanga thil pawimawh (data) lakchhuah te, Delete/Erase tawh lakchhuah leh Storage Device chhe tawh atanga thil pawimawh lakchhuah te a theih dawn a. Hnuchhuina ah finfiahna (evidence) neih theihna kawngah nasa takin a tangkai dawn a ni,” a ti a. Cyber Crime chungchangah mitin kan fimkhur a tul thu pawh sawiin, “Ho te-a an ngaih thil te hian kan rohlu te, kan zahawmna te, kan himna te a ti boin a tichhe thei tih hi hriain heng Technology kan hman danah te hian fimkhur a tul hle a ni,” a ti bawk.

Cyber Forensic Laboratory hi Sawrkar Laipuiin hmeichhiate an him zawkna tura a hmalakna lian tak, Nirbhaya Fund Scheme hmanga din a ni a. India ram-a State 10 te Pilot Project atana thlan zingah Mizoram FSL pawh telin Nirbhaya Fund atanga cheng nuai 415 an dawng a. He Fund hi Cyber Forensic Laboratory dinna atan leh DNA Division tih changtlun nan hman a ni. He Lab-ah hian Mobile Phone leh Computer atanga data lakchhuah a enfiah te, Data nawhreh tawh leh Hard Disk chhia atang pawha evidence pawimawh tak tak laklet te, Cryptocurrency hmanga pawisa inthawn dan chhuite, pawikhawihna hmunah eng Cell Tower te nge awm tih hriat theih te bakah email chhui te an ti thei dawn a ni.

Mizoram Forensic Science Laboratory hi kum 1998-a din niin 2015 khan Directorate-ah hlankai a ni a. Director tiamin Forensic Expert 15 an awm mek a. Division changtlang tak 7 an nei tawh a, Cyber Forensic Laboratory hi Division 8-na a ni dawn a. Kum 2021 chung khan pawikhawihna hmun 52 enfiahin, Case 890 leh Exhibit 6885 an endik a, heng an Case te hi Court-ah an dinpui thin bawk a ni.