Serchhip DIPRO leh MJA (SD) hruaitute inkawm

Serchhip District Information & Public Relations Officer K. Saitluanga MIS chuan nimin khan Mizoram Journalist Association (MJA) Serchhip District hruaitu thar te a Pisa-a leng ah sawmin inkawmna an nei.

He inkawmna Serchhip DIPRO Pisa-a neih ah hian Serchhip DIPRO chuan MJA Serchhip District in Annual Conference neia hruaitu thlanna an neih a thlantlin te chu a lawmpui thu a sawi a, MJA te nen a tulna apiangah mipui rawngbawlna atana thawkho tura an inrin reng thu sawiin, District huapa sawrkar thil pawimawh awm apiangte pawh an beng thleng thei ngei thin tura hma lak sak dan turte pawh ngaihtuah zel anih tur thu a sawi a. Thawhhona tha tak an lo neih tawh anga thawhhona tha an neih zel a duh thu a sawi bawk.

He hunah hian MJA Serchhip District President C. Lalhminghlua pawhin Serchhip in DIPRO tha tak an nei chu lawmawm a tih thu leh I&PR Department leh MJA ten thawhhona tha tak an lo nei tawh thin chu lawmawm a tih thu sawiin, Serchhip-a DIPRO ten MJA thil tihna hrang hrang ah hneh taka an lo uap tawh thinna ah pawh lawmthu a sawi a. Journalist te chu mipui leh sawrkar inkara awm an ni tih sawiin, Journalist chuan Pawl emaw, Political party emaw leh chi-bing rilru an put ve loh a tul thu a sawi bawk.

He inkawmna ah hian thawhhona thil pawimawh hrang hrang sawiho niin sawrkar hmalakna te a huho-a tlawh theih dan turte pawh an sawiho bawk a ni.