District Hospital thar chungchang thlen tum

MJA Serchhip District chuan Serchhip District Hospital thar sak thuai a nih theih nan Health Minister hnenah thlen nise an ti.

MJA Serchhip District hian Inrinni khan Executive Meeting neiin Annual Conference 2022-a resolution an pass, “Serchhip District Hospital thar sak a nih thuai theih nan a tul anga hmalak ni rawh se” tih bawhzui nan District Medical Superintendent kaltlangin Health Minister hnenah hemi chungchang hi thlen nise an ti a. Sawrkar hmalakna a tam thei ang tlawh tura rel pawh a remchan anga bawhzui relin Chanchinbu-a Private Advertisement rate siam chungchang pawh a duangtu tur inruatin la thlirho leh nise an ti a ni.

Serchhip bialtu MLA Lalduhoma hnen atanga MLA Fund cheng nuai 5 an hmuh hmangin Serchhip Press Club pawh sak chhunzawm leh nise an ti a, hemi atan hian Building Committee an siam a, Press Club Office Assistant atan R.Lalmuansanga ruatin, Press Club-ah Cable TV leh Internet Connection lak nise an ti bawk. Hei bakah hian Agriculture Department ruahmanna in Exposure Tour neih an rel bakah an pawl inrelbawlna hrang hrang relin, an member COVID-19 hri kai mi pakhat chu Rs. 1000/- in kan nise an ti bawk.