Serchhip District chhunga khua/Village 18 te hri leng vangin Red Zone-ah puan an ni

Serchhip District chhunga khaw 18 te chu tun thla ni 16 thleng atan ‘Red Zone’ ah puan a ni a, heng khua ah te hian hri leng avanga inkhuahkhirhna khauh zawka kalpui a ni ang.

Hemi chungchanga Serchhip District Bawrhsap leh District Disaster Management Authority Chairman ni bawk Nazuk Kumar-i’n nimin a thuchhuah a siam ah Serchhip District chhunga COVID-19 hri darh dan kar khat chhung (Feb. 1-7, 2022) Rapid Response Team ten zirchianna neiin hemi hnua rawtna an siam angin heng khua leh Veng te hi Section 34 of the Diaster Management Act, 2005 leh The Mizoram Epidemic Diseases (Covid-19) Regulations, 2022 Clause 8(2)(k)-in thuneihna a pek angin February 9, 2022 atanga February 16, 2022 thleng ‘Red Zone’-ah puan an nih thu a tarlang a ni.

Red Zone atana puan tak te hi Bawktlang, Buangpui, Chhiahtlang Kawn Veng, Chhiahtlang Zotuithiang (Venghlun leh Vengchung), Chhingchhip Venghlun (Sainik), Chhingchhip Venglai, Serchhip Field Veng (Ramthlun Veng), Hriangtlang, Kanghmun South, North Vanlaiphai Rahsi Veng, North Vanlaiphai Venglai, Neihloh, New Serchhip North, Thenzawl Branch-I (Zote Veng, Vengchhak, Venglai), Thenzawl Bazar Veng (UPC Veng, Dinthar), Thenzawl Field Veng (Electric, Vacha Dil, AYUSH, Ramthar), Thenzawl Vengthar (Horticulture College) leh Serchhip Vengchung te an ni.

Red Zone-a puan ah te hian hri leng a darh zel loh nan leh mipuite an lo him zawk theih nan inkaihhruaina siam niin phalna pek bik te chu a hranpa a dilna siam ngai lovin an luh leh chhuah phalsak an ni a, heng Red Zone huamchhunga awm Office te chu Head Office ten inkaihhruaina felfai tak siamin CAB zawm chungin Office an kal ang. Mipui punkhawmna leh Programme chi hrang hrang te, Kohhran leh pawl hminga thil tih te, inhmuhkhawm te, inkhawm te, hnatlang te khap a ni a, hnathawktu ten an awmchilhna hmunah chuan CAB zawm chungin hnathawh phal a ni a, Bazar hmun te chu khar tur niin nitin mamawh leh eichawp dawr, damdawi dawr leh sa leh thlai zawrhna, Bazar area pawnlam ami chu CAB zawm chunga hawn phal a ni bawk. He thupek hi Veng leh khua-a Police/Executive Duty/VLTF ten khuah takin an kengkawh dawn a ni.