December thlaa ruahtui tla avangin kumin ah Mat Phai atangin Tomato thar mumal a ni dawn lo

Serchhip Mat Phai-a thlai chingtute chuan Krismas leh Kumthar vuakvet-ah ruahtui tla chu nasa takin an tuar tih sawiin, a bik takin an Tomato te chu a chhe deuh vek tih an sawi a, hei vang hian kumin ah Tomato tharchhuah tur an nei mumal dawnlo tih an sawi. 

He thu hi nimin a Mat Phai tlawhtu LENKAWL hnenah Serchhip Agriculture & Horticulture Cooperative Society Vice Chairman Lalramthara chuan sawiin, nikum November thla-a ruahsur avanga an Zikhlum te nasa taka a chhiat hnuah December thla a ruahsur avangin an Tomato chin te chu nasa takin a chhe leh tih a sawi a. Mat Phai-ah hian kum 5 vel Tomato an chin tawh thu leh nikum lamah an thar that avangin kuthnathawktute leh sawrkar-a Horticulture Department lam pawh phurin Farm Cart te nen pawh hma lain a hralhna tur lam thlenga buaipui a nih thu leh Mizoram chawm thei tura ruahmanna siama hma an lak thu a sawi a. Tomato chi te pawh Horticulture Department bakah NEIDA leh FOCUS atanga dawngin hma la mah se Krismas vuakvet-a ruahsur avangin khuarel chhiatna an tawk ta tih a sawi a ni.

Serchhip Mat Phai-a Tomato chingtute chuan nikum August leh September thla vel atang khan Tomato hi an chin thu sawiin, a vaiin kung 50,000 vel zet chu ching-ah an in ngaih thu an sawi a, amaherawh chu an tharchhuah mumal hma in Pul hri in manin zan khat thil thu ah heng Tomato kung te hi a ro tih an sawi a, Horticulture Department hotute hnenah hrilh nghalin anni hian damdawi (Blue Bordo) te pein han kap mah se hri hi a chak lutuk avangin ven theih a ni lo tih an sawi a, Tomato ching hmasa ten tlem tlem an lo thar hman bak chu a kung a ro bakah a rah pawh uk-in hralhchhuah tlak an thar dawn lo nia a lan thu an sawi a, a bang nawi tlem tlem erawh tualchhunga hralh tur a awm thei mai thei nia sawiin, kum dang an phak dawn loh thu leh quintal 50-100 dawn thar thin te pawhin seng tur mumal an neih dawnloh thu an sawi a ni.

Mat Phai-a Tomato ching nasa ber pawh Lalzemawia te chuan kumin a thar thei tur hian Tomato kung 5000 vel an phun thu sawiin, amaherawh chu December thlaa ruahtui a tlak hnuah zan 2/1 lekah an Tomato te hi a kung a rawn ro vek tih an sawi a, harsatna hi tawk lo sela chuan kumin hian June thla thlenga tharchhuak thei tura an inbeisei thu sawiin, Tomato chinna atana an sum senso hmun thum-a thena hmun khat pawh kumin hian hmuh an inbeisei lo tih an sawi a, an thlai dang, a bikin Dawnfawh pawh a chhiat vek thu an sawi bawk a ni.

Thlasik thlai chingtute chuan Thal ruah-sur chu nasa takin an tuar thin tih pawh sawiin, thlai dang pawh chhe mah se Tomato chuan a haw zual niin an sawi a. Zikhlum pawh kumdang an phak lo mai ang tih an hlauh thu an sawi bawk.

Serchhip Mat Phai-ah hian Tomato hi nikum lamah hlawhtling taka tharchhuah lo ni tawhin nikum Feb. 19 khan Addl. Chief Secretary hovin thawnchhuah a lo ni tawh a ni.