Mizoram-ah ni khat-a hri kai thar la tlahniam thei lo

Mizoram-ah ni khat-a  COVID-19 hri kai hmuhchhuah zat ala tlahniam thei meuh lova, niminpiah khan Sample 8125 enfiah atangin hri kai mi 2224 hmuh leh niin Sample enfiah atanga za zela 27.37 te chuan hri an kai a ni.

Niminpiah khan ZMC-a RT-PCR Laboratory-ah Sample 1376 enfiah niin heng atang hian hri kai mi 398 hmuh an ni a, Lunglei a RT-PCR Laboratory-ah Sample 95 enfiah niin hri kai mi 34 hmuh an ni bawk. Fluorescent Immunoassay Test hmangin Sample 184 enfiah ni bawkin hri kai mi 45 hmuh an ni bawk a, an zinga 35 te chu Aizawl District-a hri kai hmuh te niin Serchhip District-ah hri kai mi 10 hmuh an ni bawk.

District hrang hranga TrueNat Laboratory-ah Sample 129 enfiah niin heng atang hian hri kai mi 38 hmuh an ni bawk a, an zinga 13 te chu Serchhip District-a hri kai hmuh te niin Lawngtlai District-ah 7, Hnahthial District-ah 6, Khawzawl District-ah 5, Aizawl District-ah 4 leh Mamit District-ah hri kai mi 2 hmuh an ni bawk.

Rapid Antigen Test hmangin Sample 5431 enfiah ni bawkin heng atang hian hri kai mi 1709 hmuh an ni bawk a, an zinga 963 chu Aizawl District-a hri kai hmuhchhuah niin Lunglei District-ah 207, Mamit District-ah 165, Saitual District-ah 157, Champhai District-ah 122, Kolasib District-ah 99, Serchhip District-ah 77, Khawzawl District-ah 68, Hnahthial District-ah 36, Siaha District-ah 35, leh Lawngtlai District-ah hri kai mi 33 hmuh an ni bawk.

Heti hian nimin thleng khan Mizoram-a COVID-19 hri kai hmuh tawh zawng zawng chu 1,88,109 niin nimin-a hri kai mi 2409 enkawl dam leh te nen mi 1,75,904 te enkawl dam an ni tawh a, hri kai hmuh te atanga za zela 93.51 te chu enkawl dam ni tawhin hri kai enkawllai mi 11,582 an la awm a, hri kai zingah mi 623 boral tawhin an zinga 504 te chu natna dang nei tel an ni thung.