Home Minister-in Cyber Jagrookta Diwas a hawng

Cyber Crime laka mipuite kan him theihna tura inzirtirna, Cyber Jagrookta Diwas hawnna inkhawm chu nimin khan Home Minister Lalchamliana hovin Aizawl-a Taxation Auditorium-ah neih a ni.

Home Department buatsaiha ‘Cyber Jagrookta Diwas’ hawnna hunah hian Home Minister chuan khawvel thiamna sang zelah Information Technology thang nasa kan chhawr tangkaiin, thil tih a awlsam phah viau lai hian bumna lakah kan fimkhur erawh a ngai, a ti a. Website hrang hrang te bakah Netbanking te, Online Shopping te, Online Games te leh Social Media application hrang hrang Mizo mipuiten kan hmang tangkai em em a. Amaherawhchu, keini aia thiam zawk leh hre ril zawk, kawng dik lo zawnga hmang duhtuten inbumna chi hrang hrang rawn duang chhuakin mi tam tak an bum a, heng inbumna laka kan inven thiam theih nan Cyber Jagrookta hi India ram pumah buatsaih a ni, a ti a. Thla tin Nilaini hmasa bera hman thin tur, Cyber Jagrookta Diwas hi Cyber Crime lama mipui fimkhurna chawk thotu atan leh an hriatna tifimtu atan te, an nun leh rohlu te a lo him zel theih nana tangkai a nih ngei a beisei thu Home Minister chuan a sawi bawk.

Cyber Crime chi hrang hrang te hi hlawm lian tak takin chi li (4)-ah then a ni a, chungte chu - Financial Fraud (pawisaa inbumna), Computer/Data Hacking (mi website va tihchhiat te, va tih danglam te), Privacy (Mimal thuruk inruk sak te, thlalak leh video engemaw lo lak saka tihchhuaha vauna) leh Cyber Terrorism (Internet kaltlanga invauna hrang hrang te, terrorist ho ten mi fuihpawrh thei leh rilru chawk tho thei thil an dah te) a ni.

Mizoram Police SP (Crime) hnuaiah Cyber Crime Police Station awmin Staff indaihlohna karah hmalak mek a ni a, kum 2021 chhung khan Cyber Crime kaihhnawihah FIR 482 a lut a. Heng te hi Financial Fraud-ah 345, Social Media/Sexual Harassment-ah 86, Sextortion-ah 14, Social/Sexual Media harassment-ah 12, Misc-ah 8, False Rumor-ah 7, Identity Theft-ah 6, Copyright Infringement leh Hacking/Phishing-ah 2 ve ve te an ni.