Mizoram-ah Rubber hnai theih kung nuai 2 vel awm

Tun dinhmunah Mizoram pumah Rubber kung puitling hnai theih nuai 2 vel a awm tawh.

Nimin-a Assembly Session zawhna leh chhanna hunah MNF Member pahnih Dr. K. Pachhunga leh Zothantluanga te zawhna leh member dangte zawh belhnate chhangin Land Resources, Soil & Water Conservation Minister R. Lalzirliana chuan Rubber kung puitling, hnai theih nuai 2 vel a awm thu hi a sawi a, a hnai chu kg. khat Rs. 145-in hralh thin a nih thu te, sawrkarin Rubber puitling hnai mai turte tan Rubber Smoke House 50 sak a tum thute a sawi bawk. Minister R. Lalzirliana chuan, tunhma in Rubber hnaite chu Tripura leh State dangahte hralh thin a nih laiin tunah erawh Rubber chingtu ten Mizoram chhungah ngei an hralh thei tawh tih a sawi a. Rubber Board of India pawhin Aizawl-ah Office an neih tawh thu te, an hnuaiah Company pakhat Manimalyar Company awm tir tura hmalak mek a nih thu bakah he company hi a awm theih chuan man man zawkin rubber hi an lei thei dawn tih a sawi bawk.