Serchhip District chhung North Vanlaiphai Village Council-a inthlanna chu tluang taka zawhfel niin Party hrang hrang ten an Seat lak zat an la leh vek a, Vote thlak hmasak-a thlantlin pakhat erawh a tling zo ta lo thung.
Niminpiah-a Mizoram-a Sample enfiah te atangin COVID-19 hri kai mi 14 hmuh belh leh an ni a, Mizoram-a hri kai hmuhchhuah chu sang li an tling ta.
Serchhip District Police te chuan Krismas leh kumthar vuakvet-a mipuite himna tura hmalak dan tur nimin khan Serchhip District SP, R. Sathiyasundaram hovin a Pisa-ah an sawiho.
Horticulture Department in Sailiamkawn-a 'Satellite Cold Room' an siam chu tangkai taka hman zel niin nizan hmasa khan Leng khua in an thar Sethlum te chu vawnthat tura dahluh a ni.
Serchhip District Level Task Force on COVID-19 Vaccination chu nimin khan an Chairman, Serchhip District Bawrhsap, Kumar Abhishek kaihhruaia thukhawmin COVID-19 Vaccine a taka pekchhuah theih a nih huna vaccine pek hmasak tur ruahmanna te, District puma vaccine sem a nih huna mamawh turte an sawiho.
National Highway-54 laihzauh leh siamthat hna thawh mekah Serchhip khawpui chhung helna tur, Kikawn atanga Sailiamkawn-a chhuak tur laih hna chu thawh tan a ni ta.
Serchhip District chhunga Rubber chingtu chhungkaw 7 te hnenah Land Resources, Soil & Water Conservation Department chuan nimin khan Rubber sawngbawlna leh a herna khawl an pe a, heng khawl te hi Assembly Deputy Speaker, Er. Lalrinawma chuan Serchhip atangin a vailiam a ni.