Liqour (Zu) leh Wine hi thil hrang a ni a, tehna thuhmuna teh chi a ni lo - Lalduhoma

ZPM Leader Lalduhoma chuan, “Liqour (Zu) leh Wine hi thil hrang a ni a, tehna thuhmuna teh chi a ni lo,” a ti.

Grape chingtute manganna chungchanga nimin a thuchhuah a siamah ZPM Leader Lalduhoma chuan Mizoram-ah Grape hi kum 2005 atang khan eizawnna thama chin tan a nih thu leh tunah hian Hnahlan leh Champhai velah chhungkua 750 velin an ching mek tih sawiin, MLTP Act 1995, Section 70-na hnuaiah Mizoram Excise and Narcotics (Wine) Rules, 2008 siamin Sawrkar hriatpuia chin a ni tih a sawi a. Hnahlan-ah leh Champhai-ah Society changtlung zawkin din a nih thu leh Grape kung za nei chin Member nih theih niin Winery pawh hmun hnihah din a ni a. Sawrkar pawhin a tuipui avangin heng Society pahnihte hnenah hian bul tan nan MIP hnuaiah cheng nuai 166 lai pein Horticulture Department chu Nodal Department an nih thu leh Technical Mission hnuaiah Fermentation Tank te, a lawhna tur Plastic Crate te, Cold Room te, damdawi te, Leitha leh a zamna tur GI Wire te pein a tanpui reng thin tih a sawi.

Lalduhoma chuan Wine chi hrang hrang- Zawlaidi, Zo Wine, Champhai Wine, Isabella te siam a nih thu pawh sawiin, a quality pawh a sang chho ve zel tih a sawi a, kum 2016 atang khan Sacramental Wine an siam chu bur khat Rs. 100/- in Mizoram Baptis Kohhran chuan an leisak bakah Mizoram pawn lamah te pawh a Market dap zelin Radiant Manufacturer, Guwahati-ah Semi-blended Wine chu Litre khat Rs 65/- in an hralh thu te, December, 2021 khan Pragati Maidan, New Delhi-ah Food Innovation Exhibition-ah Isabella chu ken niin, hralh a kal hle dawn nia hriat a ni tih a sawi bawk.

ZPM Leader chuan Grape chingtu ten phur taka hmalam an pan mek laia Cabinet Sub-Committee in thutlukna lungchhiat thlak tak mai a siam ta thut chu Grape chingtute tan chuan ‘Chem lova lulak’ a tling tih pawh sawiin, “ZPM chu kuthnathawktute thian a nih angin Grape chingtute natna ah hian kan na ve a, thinlung takin kan tawrhpui a ni,” a ti a. “Sawrkar hriatpuina ngeia hma la an ni a, sawrkar sum pawh tam tak sen a ni tawh a, warning pawh inpe miah lova hetia barakhaih thut an ni ta mai hi hriatthiampui harsa kan ti,” tiin he thu hi Cabinet in ennawn leh se an duh thu leh Sub-Committee thu hi an kaltlangpui dawn a nih chuan zangnadawmna te pein, eizawnna danga an pakai leh theihna khawp ruahmanna siamsak ngei an phut thu a sawi a ni.

Lalduhoma chuan Food Safety and Standards Authority of India chuan Wine chu Food item-ah dahin, Winery pawh Food Processing Unit-ah a ngai tih pawh a sawi bawk a ni.