NE State dang tana pawha thikawm hial tura Mizoram duhsakna Chief Minister in lawmawm a tih thu a sawi

Union Finance Minister Nirmala Sitharaman-i’n Union Budget 2022-2023 a pharh takah India hmarchhak State dangte tan pawha thikawm hial tur khawpa Mizoram duhsakna a lantir chu ropui aih thu leh lawmawm a tih thu Mizoram Chief Minister Zoramthanga chuan a sawi.

Chief Minister Conference Hall-a nimin-a thuthar thehdarhtute a kawmah Mizoram Chief Minister Zoramthang chuan, Union Budget pharh takah hun danga tih ngai loh, India hmarchhak-te tan enkawlna tur bik Budget pangngaiah nilo, Prime Minister New Development Initiative for North East Scheme (PM-DevINE)-ah cheng vbc. 1500 additional-a a dah chu lawmawm a tih thu a sawi a. “A lawmawm zualna chu, additional-ah cheng vbc. 1500 min pek belhnaah NE State dangte tan pawha thikawm khawpa hmun thuma thena hmun khat aia tam Mizoram chan tur cheng vbc. 600 ngawt mai min rawn pe hi a ni,” a ti.

Chief Minister Zoramthanga chuan, Mizoram tan cheng vbc. 600 hu Project pahnih - Aizawl by-pass road atan cheng vbc. 500 leh Bamboo Link Road pilot project atan cheng vbc. 100-te a lo hrin chhuah theihna atan hian nikum tawp lama sawrkar laipui dawra Mizoram in a mamwh zia nasa taka nawr a, an zinna rahchhuah nia a rin thu a sawi a. “Hei hi chu a hmawr hawnna a ni a, a dang a lokal leh zel dawn a. ‘Kumin atana a Final-na a ni lo e, Channel kan rawn hawng a ni e,’ an tih kha a lawmawm a. ‘Heti a nih chuan a dawt lehzelah pawh in Project siam dan a zirin a tul kan tih angin a dang pawh lokal lehzel thei tur a ni,’ an ti,” tiin Chief Minister hian a sawi bawk.

Bamboo Link Road chungchang zawhna chhangin Chief Minister hian, “Tunah hian a hmun tur leh a zau zawng te, a thui zawng vel an buatsaih mek chu an peih tawh an ti a. Tun kar chhungin emaw, chawlhkar tharah emaw min pek hman ka ring. Pilot Project a nih angin khawi lai kil hla lutuk a rem lo a. Hei hi chu a entirna tur chauh a nih avangin Aizawl bulhnai deuh cheng vbc. 100 chu kan bel zo maiin ka ring a,” a ti a. India ramchhungah hian Bamboo Link Road hi a la awm ngai loh thu sawiin, “Hei hi State dangin an sak ve ngai reng reng loh hla a ni,” a ti bawk.

Aizawl by-pass road chungchangah, “Tuna Aizawl by-pass road atana cheng vbc. 500 hi chu khawthlang lam (western side) lam a ni a. Sihhmui atanga Lunglei kawng zawm tura Mual-lungthu lama chhuak tur a ni. Hman atanga PWD Engineer hoin an lo rawt tawh kal zel a ni a. Tuna mi hi chu DONER kaltlanga Mizoram PWD an rawn pek liau liau tur a ni,” a ti a, Aizawl by-pass road dang project erawh chu khawchhak lamah NHIDCL in an buaipui mek thu leh Aizawl-a lei verh (tunnel) tur pawh tunah hian a concept stage-ah a la awm mek thu a sawi bawk.

Sorkar Flagship Programme SEDP sem chungchangah thuthar thehdarhtute zawhna chhangin Chief Minister chuan, “SEDP hi mipui khai chhuahna tur atana kan tih a ni a. Amaherawh chu, kan Funding System hi tam lutuk kan hisap ngam lo a. Chuvangin, a bul tanna rahbi pakhatnaah chhung-kaw pakhatah cheng sing nga kan target a. A tlem bera chhutin SEDP dawng tur hian chhungkaw 60,000 khum ngei ngei kan tum a. Chu chu cheng vbc. 300 velin a daih,” tiin, a Trade a zirin chhungkaw pakhatin an dawn tur zat a khum leh hniam deuh te a awm tur thu a sawi.

Chief Minister chuan SEDP chu a bul tanna chauh ala nih thu pawh sawiin, pawisa an hmuh dan a zirin thawh hnihna bakah leh mipui tam zawk huap thei tura hmalak zel an tum dawn tih a sawi a. SEDP chu Budget chhung atangin emaw, Loan System atanga pek a ni dawn tih sawiin, pawisa fai emaw, pawisa hu in trade hrang hranga kalpui a nih dawn thu leh Governing Body fel tak siam a nih thu a sawi bawk.