MZI leh LPS Vision tangkawp buatsaih Rimawi Award - (Gospel) chu December ni 4, 2025 zan khan LPS Arena-ah sem chhuah a ni a. H. Vanlalhlana hnenah Lifetime Achievement Award hlan niin, Esther Hnamte hnenah Special Award hlan a ni bawk.
Mizoram Larsap hlui leh Senior Advocate ni bawk, Swaraj Kaushal chu nimin khan kum 73 mi niin a thi a, Swaraj Kaushal hi Union Minister hlui Sushma Swaraj pasal a ni.
Chief Minister Lalduhoma leh hmeichhe zirlai naupangte inkawmna hun ‘Meet Your CM With Adolescent Girls: A Celebratory Plantation of Trees under BBBP’ chu nimin khan neih a ni.
Chief Minister Lalduhoma chuan Bank te chu an sum dawn (deposit) tlingkhawm atanga teha zaa sawmruk (60%) tal mipuite hnena puktir (Advance) tura beisei an nih thu sawiin, Loan pechhuak tlem leh lutuk, National Benchmark phak lo leh lutukte chu en liam mai chi niin an ngai lo tih a sawi.
Mamit SP Manny Bhushan Singh IPS chuan ‘Kendriya Grihmantri Damshata Padak 2025’ dawngtu SI Samuel Lalramenkima, Mamit DEF chu nimin khan Ministry of Home Affairs in Lawmpuina lehkha (Appreciation letter) a pek chu a hlan.
Public Health Engineering (PHE) Department-in ‘Tui Leak Report-na App’ an buatsaih hmang tha zual te chawimawina hun nimin khan buatsaihin he hun hi PHE Minister Prof. Lalnilawma chuan a hmanpui a ni.
India ram puma School zirlai naupang te pual Quiz Competition Final neih turah Mizoram atangin Mount Carmel School, Chaltlang leh La Montessori School, Mission Veng te chu tel turin an tling.
Food, Civil Supplies & Consumer Affairs Department changtu Minister B. Lalchhanzova chuan nimin khan ‘Consumer-te Zin Kawng’ tih lehkhabu Lallunghnema ziak chu Aizawl Press Club-ah a tlangzarh.
Nimin khan KVK Kolasib chuan kuthnathawktute hnenah Alu chi an semchhuak a, he hun hi Agriculture Minister PC. Vanlalruata chuan khuallian niin a hmanpui a ni.
Tunlai thiamna hmanga pipu sulhnu hlui haichhuah hna, Archaeological Excavation Thawhhnihna (Phase-2) chu niminpiah khan Khawbung BDO Lalchhandami Pachuau chuan Champhai District-a Dungtlang hmunhlui-ah a hawng.
Sawrkar kum kal mekah April atanga November, thla 8 chhungin Taxation Department chuan kawng hrang hrang atangin Chhiah cheng nuai 86,523 a hmu tawh a; thla liamta November khan cheng nuai 7,909 a hmu a ni.
Kumin-a Thingtam lo thlengah Mizoram District 11-a kuthna-thawktu chhungkua 5,317-te buh leh bal leh thlai thar tur beisei atanga za zela 42.06 chu Sazu puangin an seh chhiatsak a; Mizoram sawrkara Disaster Management & Rehabilitation Department hnenah Agriculture & Farmers Welfare Department chuan Thingtam vanga Sazu puang hi State Specific Disaster-ah puang turin an ngen a, amaherawh chu State Specific Disaster a puan kher ngai lovin State Disaster Respond Fund hnuaia norms awmsa atangin Sazu puang tuartu loneitute hnenah tanpuina pek a ni dawn a ni.
Agriculture & Farmers Welfare Minister PC. Vanlalruata chuan nimin khan Thingdawl Agriculture Farm-ah RIDF - XXVII leh NABARD sum cheng nuai 258.88 senga siam 'Solar Powered Cold Storage for Potato Seeds' chu a hawng a, he Cold Storage hi Uttar Pradesh-a Inficold India Pvt. Ltd te sak niin Metric Tonne 100 leng a ni a, Cold Room pathum awmin, a khawl chawm tur Solar Plate 117 bun a ni a, hei hian kawlpetha KiloWatt 63.7 pechhuak thei tura duan a ni a, kawlpetha awm lo palh pawha hman theih tur kilo-volt-ampere 35 pechhuak thei Generator dah a ni bawk.