Nimin khan Chief Minister Lalduhoma hovin Chapchar Kut Organising Committee chu CM Conference Hall-ah an thukhawm a, he hunah hian kum 2025-a Chapchar Kut hman tur atan inbuatsaihna hrang hrang thlirin, Programme Committee leh Chapchar Kut Souvenir Editorial Board an din a, Chapchar Kut hman dan tur tha zawk a awm theih beiseia Art & Culture Department-in inrawnkhawmna (consultation meeting) a buatsaih atanga rawtna lut te chu Programme Committee lamin lo thlir se an ti a ni.
Mizoram State Biodiversity Board chuan nimin khan Biodiversity Management Committee (BMC) Member-te tan Capacity Building & Training a buatsaih a, EF&CC Department changtu Minister Lalthansanga chuan a hmanpui a ni.
Sports Minister Lalnghinglova Hmar chuan Olympic discipline ten sawrkar atanga Incentive an dawn ang za a sawmnga (50%) zel Olympic discipline ni lo ten an dawng dawn tih a sawi.
PWD changtu Minister Vanlalhlana chuan MUP member-te chu kan tobul min hriattirtu leh history a taka kan hmuh theihte an ni tih a sawi.
Mizoram Board of School Education (MBSE) chuan High School Leaving Certificate (HSLC) leh Higher Secondary School Leaving Certificate (HSLC) Exam neih hun tur a ruat fel ta.
Agriculture, Irrigation & Water Resources Minister P.C. Vanlalruata'n loneitu ten an mamawh em em Wholesale Market tha nei turin sawrkarin chak takin hma a la mek tih a sawi.
Ministry of School Education-in Mizoram Samagra Shiksha hnuaia PM SHRI School te tana ni 25 chhunga tihtur hrang hrang a ruahman atanga an intihsiakna lawmman chu nimin khan sem a ni.
Boruak thianghlim pawimawhzia midang zirtir nana Thirsakawr hmanga India ram State zawng zawng leh Union Territory (UT) 5 fangchhuaktu Vanlallawmzuala Varte, Mission Veng Aizawl chu nimin khan Mizoram Pollution Control Board (MPCB) buatsaihin chawimawi a ni.
Mipuiten Land Revenue & Settlement department te awlsam taka an dawr theihna tur online service portal, e-ram ti a vuah, Development of Comprehensive & Integrated GIS based System for Maintenance and Management of Land Records in Mizoram portal chu nimin khan Chief Minister Lalduhomna chuan a hawng.