CAB zawm chungin Serchhip District-ah chhun-ah inkhawm pangngai neih phal a ni

Serchhip District-ah CAB khauh taka zawm chungin chhun-ah chauh Kohhran Inkhawm pangngai neih phal a ni.

Serchhip District Bawrhsap leh District Disaster Management Authority-a Chairman ni bawk Nazuk Kumar IAS chuan COVID-19 laka mipuite an him theihna tur inkaihhruaina thar (SOP) chu niminpiah khan a tichhuak thar a, hemi ang hian Sakhaw Biak In leh Inkhawm chungchangah CAB khauh taka zawm chungin chhun-ah chauh Biak In-a leng zat chanve (50% seating capacity) aia tam lovin Kohhran Inkhawm pangngai neih phal a ni tih tarlan niin, zing leh tlai tawngtai inkhawm pawh phal a ni a. Kohhran Inkhawmpui pawh chhun lamah neih phal niin Inkhawmpui neihna hmun Biak In-a leng zat chanve (50% seating capacity) tel phal a ni a. COVID-19 symptoms neite chu Inkhawmpui-ah hian tel loh tur niin natna benvawn nei leh kum upa hriselna chak tawhlote a theih chin chinah âwl nise tih a ni a. Ruai buatsaih loh tur niin Hripui darh huk theihna tur ven nan a theih chin chinah, hla/rimawi thun (record) sa te play tur a ni a. Zaikhawm, zaiho leh zaipawl anga hla sakte khapa ni a. A thlengtu Kohhran-in VLTF- te phungbawma sawmin CAB/SOP Implementation Committee an din ang.

SOP tihchhuah thar ah hian a hmaa kalphung nena thil thlak danglam lutuk a awmlo niin a lang a, Inneih inkhawm leh mitthi vuina te neih theih niin a hmuna leng zatve emaw, mi 50 aia aia tamlo (a tlem zawk zawk) tel theih niin ei leh in sem phal a ni lova. Picnic spot leh Movie Theatre te, Public Park, Swimming Pool leh Sahuan (Zoo) te hawn phalloh niin Sports practice (Indoor & Outdoor) pawh phalloh a ni a. Sports inelna (Tournament) khap niin mipui punkhawmna (Anniversary, Birthday, adt) chu khap niin sawrkar phalna la-a National/State Level Programme pawimawhte chu huaihawt phalsak a ni thei anga, a hmuna leng zat chanve emaw, mi 50 aia tamlo (a tlem zawk zawk) emaw tumkhata punkhawm phal a ni a, zaikhawm, zaiho leh zaipawl anga hla sak te khap a ni bawk.

Class X leh XII Board Exam turte chu School Education Department thuchhuak angin CAB tha taka zawm chungin School leh Hostel hawn phal a ni a, Class I atanga Class IX leh Class XI zirlaite tan School leh Hostel khar a ni anga, online-in class lâk chhunzawm a ni ang.