Chanchin thar lawrkhawm :

Speaker in case file tum lo

Mizoram Legislative Assembly Speaker Lalrinliana Sailo chuan Ngaizawl kawng siamna sum cheng nuai 100 la anga amah puhna thu ah 'intihhmingchhiatna' (Defamation case) file a tum lo tih amah kawmtu thuthar thehdarhtute hnenah a sawi a, dikna chu Pathian in a hria tih sawiin, Audio Voice record-a a hming lang chungchang ah Defamation Case file tul a tih loh thu leh a tum loh thu a sawi a, Pathian in rem a tih chuan hun remchangah hemi chungchangah hian Press Conference neih a la tum thu a sawi bawk. Hetihlai hian Ngaizawl khaw kawng siamna sum cheng nuai 100 Speaker in a la nia sawi chungchang chhui tura ZPM Party-in Feb. 23, 2022-a Lok Ayukta-a ngenna an thehlut chungchangah Lok Ayukta Chairman C. Lalsawta chuan PWD-ah detail information (project cost, DPR siam dan, tender chungchang etc.) an dil tur thu leh chu chu an zirchian hnuah thubuai kalpui dan tur an la ngaih-tuah dawn thu a sawi bawk.

MJA ten ramri an tlawh

MJA Kolasib District Member te chuan Inrinni khan Vairengte tlak lam, Mizoram leh Assam inrinna Aitlang-a Mizoram sawrkarin kawng a laih te, Vairengte IOC leh  Phaisen inkar kawng laih leh Aitlanga Mizoram Police awmna hmun hrang hrangte an tlawh a, Mizoram sawrkarin State  boundary ngai pawimawha kawng tha tak mai a siam chu lawmawm an tih thu sawiin, he kawng hi a Fur a Thala lirthei tlan theih tura kawng siam anih theih nan  sawrkarin hmala se an duh thu an sawi a. Police Duty Camp te pawh tlawhin tui leh Eng an neih thatloh avangin an harsatna sutkian sak turin sawrkar an ngen bawk.

C&I Minister in hawng

Commerce & Industries Minister Dr. R. Lalthangliana chuan Inrinni khan Lunglei Electric Veng-ah NABARD sum cheng nuai 1082.93 senga sak Agri-Marketing & Training Infrastructure Building hawngin he building hawn thar hi Zopa chhiara chhawng nga-a sang a ni.

Minister in Mamit tlawh

Mizoram tlawha rawn zin mek Union Minister of State for Health & Family Welfare Dr. Bharati Pravin Pawar chuan nimin khan Mamit tlawhin sawrkar hotute leh NGO aiawhte a kawm a, Aspirational District hnuaia hmasawnna tur Parameters hrang hranga an hniamna te chu chak taka hmasawn dan tur ngaihtuaha Scheme zirchiang turin a hrilh bawk.

Mutia/Labour rate to sawiho

Mizoram Merchant Association (MIMA) chuan Inrinni khan Mizoram Transporters hrang hrangte chu an Office-ah kokhawmin Mutia/Labour man to ta lutuk chungchang an sawipui a. Transporters te chu Mutia/Labour te ID siamtir vek tur leh Mutia/Labour bungrua phurh man ti to te chu Transporter-te hnenah thlen zel tur leh hetiang mi te chunga a tul anga hma la turin inremna an siam bawk.

Forest Minister in tlawh

Environment, Forests & Climate Change Minister TJ. Lalnuntluanga chuan Inrinni khan Aizawl Bethlehem Vengthlang-a Mau leh hnang (rattan) zirbingna hmun, Forest Research Centre for Bamboo & Rattan (FRC-BR) chu a tlawh a, helai hmuna thawk te chu Mau leh rattan chi tha Mizorama chaw lut a, heng hmanga loneitute leh kuthnathawktute dinhmun siamthat theih dante leh hlawk zawka an eizawnna kawngte tihpun a nih theih nan heng te hi an zirbingnaa ngaipawimawh turin a chah bawk. Minister hian mihring thiamna hmanga nauban tihpunna, ‘Artificial Pollination of Orchids’ chungchanga he Centre in DVD an siam chu a tlangzarh bawk.