SHC sawrkar rintawklohna Motion putluh a ni

Hmar Peoples Convention (HPC) hruaitute chuan nimin khan Sinlung Hills Council (SHC) Pisa-ah thuthar thehdarhtute kawmin, SHC sawrkar rintawk loh (No Confidence Motion) MNF member pathum leh Independent Member pathumin an putluh thu an sawi.

Thuthar thehdarhtute an kawmna ah hian HPC Adviser Remruata Varte chuan SHC-ah hian MNF leh HPC thawkdunin Seat 12-ah Seat 10 lain sawrkarna an chan thu sawiin, “Seat 5 ve ve kan la a, kan chanvo tur kan insem a ni. HPC lam chuan CEM, EM pakhat leh Dy. Chairman post kan chang a ni. CEM duh tawk lohna avangin HPC tum khat insiamremin, CEM kan thlak a ni,” a ti a, MNF nen lungrual takin harsatna awm lova an thawhho theih thu a sawi bawk.

Remruata Varte chuan February 16, 2022 khan MNF Member pathum leh Independent Member pathum in No Confidence Motion an putluh thu sawiin, “MNF member-te hian MNF Gen. Hqrs. hruaitute hriatpui lovin thil an ti a, anni pawh an rilru a na hle. Chalfilh Bialtu MLA-in Chairman chu Special Session ko turin a nawr a, hetianga a rawn inrawlh hi tha kan ti lo. Tun hnuah chuan inrawlh tawh lo turin kan duh,” a ti a. No Confidence Motion chungchangah hian CM OSD Rosangzuala a inrawlh ngeia an hriat thu sawiin HPC Adviser chuan, “No Confidence Motion chungchangah hian ramhnuai rimnam te kaltlangin Rosangzuala leh a thehluttute hi an inbe pawp ngeiin kan hria, pawi kan ti hle,” a ti a, HPC chuan Rosangzuala chu SHC-ah inrawlh tawh lo tura an ngen leh hriattir nghal thu a sawi bawk.

HPC hruaitute chuan Special Session koh a nih dawn chuan an Headquarter Sakawrdai-ah ngei neih an phut tih sawiin, “Sakawrdai-ah hian Live Telecast ngeia Session hi neih kan duh. Chutah chuan, CEM hmasa in a thil tih dik lohte chiang taka sawichhuah kan duh,” an ti a. Sinlung Hills Council chu thisen far-a sual chhuah a nih thu sawiin HPC hruaitute chuan, “Rambuai nih kan peih tawh loh avangin inremna siam a ni. No Confidence Motion hi kaltlangpui zel an tum chuan mipui Movement kan siam dawn. Inremna tha tak neih tha kan ti,” an ti a, sum leh pai leh nihna duhte'n SHC chu duh duha an tihkual an duh loh thu an sawi bawk.

Zawhna chhangin HPC hruaitute chuan Sakawrdai-ah an Headquarter Ofice tur cheng vbc. 3.33 senga sak mek a nih thu an sawi a, “PWD-in Restricted Tender hmangin tunlaia lar tak Kamrul-a a thawhtir. SHC lehzela a rawn inrawlh hi tha kan ti lo hle. Kamrul-a hian hna hi a hralh chhawng a nih hmel, a hna pawh hi a la rawn hmu kher lo mai thei a ni,” an ti bawk.