Mizoram-ah ni khat-a hri kai hmuhchhuah an pung chho leh mek a, niminpiah khan Mizoram-ah Sample 8388 enfiah niin heng atang hian COVID-19 hri kai 794 hmuhchhuah leh an ni a, Sample enfiah te atanga za zela 9.47 te chuan hri an kai a ni.
Nimin khan Serchhip District-ah COVID-19 hri kai mi 5 hmuhchhuah leh an ni.
Beti Bachao Beti Padhao (BBBP) Serchhip District hmalakna hnuaiah ‘My Aim My Target Career Awareness Campaign’ chu nimin khan Govt. HSS Serchhip Zirlai naupangte tan buatsaih leh a ni.
Lai Autonomous District Council-a MNF Sawrkar, CEM Manghmunga Chinzah kaihhruai chuan nimin khan House-ah fiahna a paltlang zo lo.
Mizoram Departmental Officers Association (MDOA) chuan nimin khan Chief Secretary Lalnunmawia Chuaungo chu chawimawina hun an buatsaih.
Govt. T. Romana College chuan Mizoram University-in Under Graduate Exam a buatsaiha an College atanga pass tha te chawimawina hun nimin khan an hmang.
Mizoram Lok Sabha MP, C. Lalrosanga chuan tunhnaia Assam leh Mizoram Police te inkahna hmun leh Saihapui V te chu nimin khan a tlawh.
Mizoram sawrkar buatsaihin Tokyo Olympic 2020-a tel Lalremsiami chawimawina hun chu Aizawl Vanapa Hall-ah buatsaih a ni.
Mizoram State Law Commission chu nimin khan an Chairman Lala Khobung hovin an thukhawm a, Dan hmanlai thenkhat chu siamtha turin sawrkar-ah thlen tura rel niin Eighth Schedule-ah Mizo tawng (language) chu telh ve turin sawrkar-ah thlen nise an ti.