Serchhip Sailiamkawn-a Police Check Post siam thar hman theih tura hawn a ni

Khawchhak lam atanga bungrua rawn lut leh dan lova bungraw tawlh te lo enfiahna tura ruahman Serchhip Sailiamkawn-a Police Check Post thar chu Serchhip SDPO Kaste Romalsawma chuan nimin khan hawngin helai hmunah hian nitin darkar 24 chhung Duty tur pawh dah nghal an ni.

He Check Post thar hi Serchhip SDPO Kaste Romalswma chuan Ribbon chepchat-a hawngin hemi puala hun hman ah nikum lam khan thuneitu sang zawk ten khawchhak lam atanga dan lova bungrua rawn lut te lo vila lo man tura an tih angin Check Post siamna tur hmun hi an zawn thu a sawi a, hmun hrang hrang an enkual hnuah helai hmun, kawngpui pathum intawhkhawmna hmun hi thlan a nih thu sawiin, helai hmun hi National Highway laihzauhna tur atana ram lak tawh, amaherawh chu kawngpui atana hman tur ni si lo a ni tih a sawi a. Helai hmun laihzauhna tur atan hian kawng siam hna thawktu Company hotute pawhin nasa taka an thawhpui thu sawiin, tunkar-a luahlut tura hma lain hawn a lo ni ta chu lawmawm a tih thu a sawi a. Helai hmunah hian Head Constable (Havilder) pakhat hovin Constable mi pathum zel dah an ni dawn tih pawh sawiin, nimin atang khan nitin darkar 24 chhung duty tur an in dah nghal thu leh Gate mumal tak siam a nih dawn thu a sawi bawk a ni.

He hun rawn hmanpuitu Central YMA President R. Lalngheta chuan helai hmuna Check Post thar hawn a ni ta chu YMA chuan lawmawm a tih thu sawiin, kan ramah thil tha lo, kan ram nun, kan moral zawng zawng pawh tichhe thei tur nia hriat Kuhva tawlh chungchang kan buaipui luih luih thu leh YMA pawhin an buaipui thu a sawi a, amaherawh chu tih theih an neih tlem thu leh sawrkar-ah February thla chhung ngeiin Check Gate rintlak siam ngei tura an ngen thu a sawi a, “Check Gate chu a awmsa teuh a, mahse a nihna takah chuan a rintlak loh a ni. A rintlak loh avanga rawn tlang zel a ni,” tiin Check Gate rintlak ngei siam tura an tih thu a sawi a, tuna a hlawhtlinna hmuh a ni ta chu an lawm hle tih a sawi a, helai hmuna Duty te pawhin kan ram leh hnam tan he Gate hi a pawimawh a ni tih hriat sak se a duh thu a sawi bawk

Tunhnaia thil thleng chungchangah mi thenkhat ten Police te pawh an rin loh lek lekna awm thei chi te he Gate hawn atang hi chuan bo in Police hmel duhawm tak a thara a lanchhuah an duh thu Central YMA President chuan sawiin, helai hmuna Duty te pawhin kan ram leh hnam tan he Gate hi a pawimawh a ni tih hriat sak se a duh thu a sawi a. “Keini pawhin he Gate hi a fair tak tak em tih te pawh hi kan en ve dawn a ni,” a ti a, mipui te pawhin he Gate hi a rintlak a ni tih an hriata YMA leh sawrkar in thawhhona tha tak an neih an duh thu a sawi a ni.

Central YMA President chuan Mizo kan ni tih sawiin, Mizoram leh Mizo Hnam lo chu ram leh hnam dang kan neilo tih pawh a sawi a, a damna tur atana thawk tlang tur kan nih thu leh a thawk tak tak chu Police te niin chumi ti chak tur chuan YMA te an awm thu a sawi a, a tul hun huna che turin an inhuam thu a sawi bawk.

Nimin a Check Post thar hawnna ah hian Serchhip SP Office-a Reserved Officer Ispr. H. Biakchhuma chuan Check Post sa tura hma an lakna te sawiin, a sakna sum hi PHQ AIGP&L atanga lo kal a nih thu leh nikum October 18-ah hma an lak tan thu a sawi a, Vawiin lam hian Gate te pawh siam nghal a nih dawn thu a sawi bawk.

Serchhip Sub-Hqrs. YMA President Kawlthuama pawhin nimin-a Check Post thar hawnna hunah hian thu sawiin, he hunah hian Serchhip Police te bakah Central YMA leh Serchhip Sub-Hqrs. YMA hruaitute an tel bawk a ni.

Tarlan tawh angin tunkar tir lam khan hetiang bawk hian Sihhmui-a Check Post siam thar chu luah tanin Duty tur pawh in dah a lo ni tawh bawk a ni.