Thingtlang Bank awm lohna ah Post Office te Bank angin a hman theih - Governor

Mizoram Governor Hari Babu Kambhampati chuan nimin khan Raj Bhavan-ah Mizoram Post Post Office hotu lian te kawmin Mizoram chhunga an hmalakna te a zawt a, Post Office te chu Bank anga hman theih a ni tih sawiin, thingtlang mi te tan Bank ang chiah a hna thawh theih dan te nasa zawka zirtirna pe turin a chah bawk.

He inkawmna ah hian Governor Hari Babu Kambhampati chuan Mizoram-ah Dak In hnathawk ten tha tak leh tangkai taka hna a an thawk chhunzawm chu lawmawm a tih thu sawiin, Mizoram hmun tinah Dak In a awm deuh vek avang leh Digital Technology tha taka hmang Department an nih angin mipui tan an pawimawh a sang em em tih a sawi a. Tunah chuan Postal Service chu lehkha, bungrua leh pawisa inthawnna chauh a ni tawh lo tih sawiin, Bank lian tak an ni tel tawh tih a sawi a. Mizoram hmun kilkhawr tam zawka cheng te tan Bank pan a la harsa hle tih sawiin, hetihlai hian Post Office chu hmun tinah deuhthaw a awm bakah, a awmlohna khua atanga pan awlsam tak a ni vek tih sawiin, “Post Office-ah te hian Saving Account te cheng khatmah dah ngai lovin a hawn vek theih zui a. Post Office-a Bank Account hi Bank pangngaia account nen a ti theih a inang deuh vek tawh bawk a. He thil hi Bank awmlohna hmuna cheng ten an hriat a ngai a; tangkai taka hman a nih theih nan Dak In a thawk ten mipui zirtirna kawngah tan an lak nasat a ngai a ni,” a ti bawk.

Governor chuan Post Office-a Account nei lo tan pawh thingtlang khua Bank ATM awmlohna ah Aadhaar Enabled Payment Systems (AEPS) - Aadhaar ATM tangkai takin an hmang thei tih sawiin, Bank Account nei te tan Aadhar Card hmangin heng thingtlang khua ATM awm lohna ah te hian Post Office-ah pawisa Rs 15000/- thleng an la chhuak thei tih te pawh hi hre lo tam tak an la awm thu a sawi a. Post Office in a kalpui ‘The Sukanya Samriddhi Account’ (SSA) – hmeichhe naupangte puala Bank Account nu leh pa te hawnsak turah pawh Post Office-a thawk ten tan an lak nasat a ngai tih a sawi bawk.

He hunah hian Post Office in Mizoram chhunga hna a thawh sawifiah niin tunah hian Head Post Office, Aizawl hnuaiah Mukhya Dak Ghar pakhat, Sub-Post Office 38 leh Brach Post Office 347 a awm a. Thawktu Officer leh Staff pangngai 175 bakah Dakpu 990 an awm mek a ni.

Comments

Popular posts from this blog

Tukverh-a tlasual boral