Kalphung pangngai angin HSLC leh HSSLC Exam tum

Mizoram Board of School Education (MB-SE) chuan kumin a High School Leaving Certificate (HSLC) leh Higher Secondary School Leaving Certificate (HSSLC) Exam neih tur chu tihdan phung pangngai anga offline hmanga nei turin inbuatsaihna an kalpui mek.

Kumin a HSLC leh HSSLC Exam neih tur chungchanga zawhna chhangin MBSE Chairman JH. Zoremthanga chuan kumin-a heng exam pahnih te offline hmanga buatsaih turin exam lama mawhphurtuten theih-tawp an chhuah thu a sawi a, zawhna pawh an peihfel tawh thu leh Centre hrang hranga Superintendent-te pawh kohkhawm vat an ni dawn tih a sawi a ni.

MBSE-in routine an siam ang chuan HSLC exam hi Feb. 28 atanga March 16 thleng neih tura ruahman a ni a, HSSLC exam chu March 1-25, 2022 chhunga neih tura ruahman ni bawkin, tuna routine an siam anga exam chu an buatsaih theih ngei an beisei tih MBSE Chairman chuan a sawi a, chutih rual chuan COVID-19 leng avang emaw, harsatna dang avang emaw a offline hmanga exam an buatsaih theih loh thulh atan pawh rua-hmanna an siam lawk tawh thu a sawi bawk.

MBSE Chairman chuan COVID-19 leng avanga zirna In-ah Class pangngai neih hleih theih a nih loh thu leh Board Exam tur ten regular class chu thla hnih vel bak an kal hman loh thu a sawi a, “Hemi avang hian nikum lama kan kalpui tawh angin pawl 10 leh 12 Syllabus chu zaa 30-in tihtlem a ni,” a ti a. Hri leng avangin zirna in pangngai kalpui theih ni lo mah se Board Exam hi namnul mai mai an tum lo tih MBSE Chairman chuan a sawi a, “Strict takin kalpui kan tum a, zirlai zingah entawn manchhuah an awm chuan exam chhunzawm thei tawh lo tura hnawhchhuah thlenga action lak kan tum,” tiin, hemi chungchang hi Centre Superintendent an kohkhawm hunah pawh an sawi uar tur thu a sawi bawk.