Lenkawl

Kumin hian Mizoram sawrkar chuan Sawh-thing quintals 3,38,354 leiin Sawhthing leina man cheng vbc. 118. 89 pekchhuah a ni tawh a, la pek loh vbc. 20 vel ala awm.

India rama sawrkar damdawi In tha bik tehna, National Quality Assurance Standards (NQAS) Certificate hmu thar zingah Mizoram atangin Marpara PHC leh Zemabawk UPHC te an tel ve leh ta a, heti hian Mizoram chhunga HWC-PHC 57 target awm zinga 40 leh HWC-UPHC 9 target awm zinga 6-in NQAS certificate an nei tawh a ni. NQAS-a tling thar Marpara PHC hian an tehna ah 91.97% hmu phakin Zemabawk UPHC hian 95.98% a hmu phak bawk a, Mizoram-a Sawrkar damdawi In 54 te chu NQAS National Certificate nei tawh a. Tunah hian damdawi In 16 leh HWC Sub-Centre 23-in State Level Certificate nei tawhin National-Level Assessment an dil mek a ni.

Empowered Committee on Investment chu nimin khan CM Conference Hall-ah an Chairman leh Chief Minister Lalduhoma kaihhruaiin an thukhawm a, Mizoram-in Full fledged Investment Promotion Agency a neih ve dan tur Planning & Programme Implementation Department-in an duan chu an enho a, State dangte kalpui dan en chunga duan a nih angin siamrem ngaite a la awm thei nia ngaih a ni a. Mizoram Special Investment Zone hmunhma tura thli thlai mek report pawh a rang lama chinfel ni se an ti bawk.

Health Minister Lalrinpuii chuan sawrkarin ruang phurhna atan cheng nuai 150.57 a seng tawh tih sawiin, Mizoram Universal Healthcare Scheme hnuaiah damdawi In hrang hrangah damlo mi 44,546 te inenkawlna bill pek sak an ni tawh tih a sawi a, ruihhlo ngaite tan nuai 113 an seng tawh tih a sawi bawk.

Transport Department chuan November ni 1, 2025-a Rel hmanga Guwahati-a kal tur khualzinte MST Bus-in a hun taka a thlenpui hmanloh avangin thupha an chawi a, hetiang thil a thlen nawn tawh loh nan Guwahati kal tur bik tan Aizawl-a Transport Complex atanga Bus chhuah hun hi darkar khat-a sawn hma a nih thu an sawi.

Mizoram sawrkar chuan ranvulhtu, a bikin Bawng, Vawk leh Kel vultute tan an ranvulh ah Livestock Insurance a kalpui dawn a, tunah hian Insurance kalpuitu tur Company zawnna atan Tender chhuah tura peihfel tawh niin Tender tihchhuah thuai tum a ni.

Kum 2020 atanga kumin (2025) September thla thleng khan Aizawl Municipal Corporation (AMC) huamchhunga lirthei chetsualna thlenga nunna chan mi 100 an awm tawh a, kumin ah mi 13 in nunna an chan tawh bawk.

Sawrkar kum kal mek 2025-26 chhunga thla sarih chhungin Mizoram sawrkar Transport Department chuan lirthei 17,656 a register thar tawh a, heng zinga 13,849 chu Two Wheeler niin lirthei mal register ah a tam ber a ni a, lirthei register thar zawng zawng atanga chhutin za zela 78.44 a tling a ni.

Lunglei District Deputy Commissioner (Bawrhsap) Office bultum a mipuite'n sawrkar hmalakna hrang hrangte an chhawr tangkai theih nan an khuaa kalchilha Service hrang hrang chhawpchhuah sakna, ‘I Kawtkai-ah Sawrkar’ (Prashasan Gaon Ki Ore) thawh hnihna chu nimin khan Lungsen leh a chhehvel khaw mipuite tan Lungsen BDO Complex-ah buatsaih a ni a. He hunah hian Office hrang hrang - Deputy Commissioner, BDO Lungsen, PHED, Power & Electricity, Health & Family Welfare, Agriculture, Horticulture leh Bank te'n Stall hawngin, awlsam zawka mipuite dawr theih turin an inphochhuak a. Aadhaar siam that/siam thar, MGNREGS Job Card siam that/siam thar, Bank Account hawn thar, Income/Tribal/Residential Certificate pekchhuah, sawrkar Scheme hrang hranga inziahluh, hriselna dinhmun endikna leh mipuiin harsatna an thlenna hun te buatsaih a ni a, mi 168-in an chhawr tangkai a ni.

Kum 2020 atanga kumin 2025 October thla thleng khan Mizoram Police Cyber Crime Police Station-ah sum kaihnawih thila inbumna, Financial Crime thubuai 197 chu chhuizui tura ziahluh a ni tawh.

Lai Autonomous District Council (LADC) Inthlanpui neih hun tur chu tihfel la ni lo mah se Inthlanpui hi neih thuai a nih rin a ni.