Cancer vei kan tam lutuk pawi ti

Health Minister Dr. R. Lalthangliana chuan Mizoram State-in ziak leh chhiar thiam tam kawngah leh kawng hrang hrangah chanchin ngaihnawm tak tak a neih thin laiin Cancer vei kan tam lutuk erawh a pawi hle a ni, a ti.

World Cancer Day puala inkhawm nimin-a Zemabawk Cancer Hospital-a neih a hmanpuina leh Mizoram State Cancer Institute (MSCI) building thar hawnna ah he thu hi sawiin Dr. R. Lalthangliana chuan National Cancer Registry Programme in report a tihchhuah thinah Mizoram-ah hian kumtin Cancer vei thar 1600 vel hmuhchhuah thin a ni, a ti. Cancer veite enkawlna tur hmun tha tak hawn a ni ta chu Mizoram tan ni chhinchhiah tlak a ni, a ti a, hei aia lian leh changtlung zawk, cheng vbc. 500 senna tur Cancer Superspeciality Hospital pawh din tum a nih dan a sawi a, he hna hi bultan thuai a nih theih nan Sawrkar Laipui hnuaia Ministry hrang hrangah Technical Committee khirkhan tak tak a paltlang fel tawh a ni, a ti.

Dr. R.Lalthangliana chuan COVID hripui leng kara Health Department hmasawnna hrang hrang a sawi lang a, hmasawnna ruhrel din kawngah leh bungraw tha lei kawngah hmasawn viau mahse thawktu tha, mithiam, Superspecialist, Clinical leh Academic-a thiamna sang filawr tak tak nei kan mamawh thu a sawi a, Mizo thalaite tan la leh zual turin a fuih nghal bawk.

Mizoram State Cancer Institute (Cancer Hospital) building thar hi Tertiary Care Cancer Centre Project niin Sawkar laipui-a National Programme for Prevention and Control of Cancer, Diabetes, Cardiovascular Diseases and Stroke programme hnuaia awm a ni a. A building bik hi September ni 18, 2020 khan CB Engineers ten an sa tan a. Ward pahnih awmin Ward pakhatah khum 16 ve ve, a vaiin khum 32 a awm a, OPD panga (5) a awm bawk.

MSCI sak a nih theih nan hian kum 2014-ah project thehluh a ni a, Central Inspection Team te chuan March, 2014-ah a hmunhma rawn tlawhin December 2015 khan cheng vbc. 44.27 chu sawrkar laipui chuan a pawmpui ta a ni. Hetah hian building sakna tur leh hmanraw chi hrang hrang leina tur a tel a. Cancer Hospital building sakna tur atan hian cheng vbc. 8.8 ruahman a ni a, bungraw mamawh chi hrang hrang 25 lei niin heng zinga 23 te hian Mizoram a thleng fel tawh a, a tam zawk hi hman tan a ni tawh a ni. Heng hmanraw pawimawh lei thar zinga langsar tak chu Cancer hemna khawl changkang LINAC (Linear Accelarator) niin hun reilote ah hman tan theih a ni dawn a ni.

Kumin-a World Cancer Day-ah hian ‘Close the Care Gap’ tih chu thupui-ah hman a ni.