Speaker kaihhruai duhlo eptu ten House chhuahsan

Ngaizawl kawng siamnaa cheng nuai 100 a laksak nia inpuhna ah Assembly Speaker Lalrinliana Sailo in Assembly Budget Session a kaihhruai duh lovin epty pawl pahnih ZPM leh Congress Member-te'n nimin khan House an chhuahsan.

Nimin-a Assembly Budget Session-ah ZPM Legislature Party Leader Lalduhoma chu rorel tan anih dawnah ding chhuakin, tunhnai maia Ngaizawl kawng laihna ah cheng nuai 100 zet Assembly Speaker Lalrinliana Sailo-in a lo ei ve a ni tih chiang taka sawi thawm an hriat thu a sawi a. Hei hian Ngaizawl khaw mipui leh Zoram mipui rilru a tihnat avangin a pawi an tih thu a sawi a. Lalduhoma chuan, “He House zahawmna tihbawrhbanna a awm lohna'n leh nangma tan ngei pawh he House hi i kaihhruai loh hi a mawi zawka kan hriat avang te leh, kan House Leader hnena kan thlena hnawl sak kan nih tak avangin he House zahawmna vawnnun nan leh kan lungawilohna lantirna'n keini chu kan lo chhuak ang e,” tia a sawi hnuah House hi an chhuahsan a ni.

Hemi hnu hian Assembly Speaker Lalrinliana Sailo hian an puhna chungchangah insawifiahin, a bial chhunga kawng siam tam tak chu a bial chhung miten 'Pakhat mah kan thawh loh chuan' an tih avanga a nawrpui thu sawiin, “Pathian khawngaihnain mi pawisa naia khat mah ka la la lo tih hi ka sawi duh a ni,” a ti a. Ngaizawl-Khawzawl inkar aiin Lungtan-Khawhai inkar kawng siam hnathawh percent hi a chhe zawk tih sawiin, “A hmuna ngei eptu party te kal se ka duh a ni,” a ti bawk.